Tura-ni DIG Western Range, Easter Monday manigiparangna niam donata 

0

Tura, April 7, 2023:Deputy Inspector General of Pulis (DIG), Western Range, Tura-ni CVS Reddy re•baenggipa April 10 tariko Easter Monday-ko manigiparangna raken mikkrakataniko on•ataha.

Re•anggipa 2022 bilsio Easter Monday manie a•selrang ong•e, bang•a janggirangko gimaataniko nikna man•aha. Uni gimin, uandakgipa a•selrangko champengna gita ia bilsio Garo Hills-ni pilak SP-rang, ka•mao on•atenggipa niamrangko ja•rike, champengataniko dakchina DIG Western Range, didiataha.

Ia bilsio Easter Monday-ko manigiparangna DIG-ni champengatgipa niamranga, pekgipa ringanirang jekai churangko picnic cha•ram biaprango ringna man•jawa. Gnigipa je manderangan picnic cha•engachim, chibima rikamoni ba chisamoni miter 50 mang chel•ao, cha•na nanga, jedakode chio sripgiparangko naljokatna man•gen. Gittamgipa, chu ringani ja•mano chi warirango auna aro jroe rona nangja. Brigipa picnic cha•gipa biaprangko rongtale rakkina nanga skatang bosturangko galna nangja. Bongagipa chu ringe garirangko salna nangja. Dokgipa pilak pulis station-rang, fire & emergency service-rang aro disaster responce-rang kengnigipa biaprang ba mongsonggipa picnic biaprangko nirok sandie, a•selo ba duko ga•akenggipa manderangko naljokatna tarisamsoaniko dakchina DIG Western Range, didiataha.

DIG Western Range-ni ge•eta gitan Garo Hills-ni SP-rang, an•tangtangni ning•o ga•akgipa pulis station-rang, outpost-rang aro ADC-rang, picnic cha•ram biaprang, tourist spot-rang, chi ontimram ba chidare-rang, manderangni roronggipa aro nironggipa biaprangko nirokchina ge•etaniko on•atskaha. Jedakode ia bilsini Easter Monday-ko maniani salo maming a•selrang ong•gija, tom•tome matchotatna man•gen, pulis department raken ja•kurangko de•e, chel•chakgipa pulis dolrangko donataha ine parakataha.

Maina bilsianti Easter Monday-ni salo chu ringe, cha•e pekani ja•mano manderang skatang dake an•tangtangni janggirangko bang•en gimaataha. Uni gimin uandakgipa a•selrangoniko naljokatna district administration, pulis department, songni nokni manderang aro NGO-rang apsan bakrime champenganiko dakna ku•monge ja•ku de•na tarisamsoaha ineba parakataha.

Leave A Reply

Your email address will not be published.