Tura, Feb 11, 2023: GSU-ni gitcham dilgipa Pa Brenzield Ch.Marak, re•baenggipa electiono INC-ni candidate ong•e, South Tura elakkao Skotong Minister Conrad Sangma baksa susaengon, an•tangni chena ka•dongsoaniko parakataha.
“Anga 51-South Tura elakkao Congress-ni candidate ong•e susaengon, anga namen ka•donga ia chango Congress chechongmotgen. Anga Congress party-o susaengon, bang•a manderangni Congress party-ona napbarikrikaniko nike, skang chongona bate batrikrikenga aro ka•dongbatenga.
Manderang Congress party-ni bilakbatrorobaaniko nike bang•a dingtang dingtang party-rangoni Congress party-o napeanichi Congress party ia electiono chegen ine ka•dongenga” ine Pa Marak kobor ra•timgiparangna aganaha.
Bang•a dingtang dingtang political party-ni candidate-rang, ang baksa susagiparang gnang, “Indiba anga darangkoba underestimate ka•ja, indiba mongsongbate angni susaani Skotong Minister baksa ong•gen. Da•alo ua Skotong Minister ong•e, manderangko tangka paisachi brena miksonge tangka paisarangko chimonge, adita manderangko tangka paisachi nosto ka•na man•gen. Uni gimin chinga Congress party-o bisong gita tangka paisachi dakgrikpana aro vote-ko brena man•jaoba, Congress party-ni kakket ong•anichi, uamang tangka paisachi manderangni vote-ko brena jotton ka•genchimoba, ia 2023 electiono chinga altue uamangko dakgrikna ka•donga aro Congress party chena ka•dongenga ineba aganaha.
Skotong Minister Conrad Sangma baksa dakgrikengon, Conrad Sangma-ni bilsi 5-na Skotong Minister ong•e, Meghalaya a•dokko sason ka•anio bang•a chu•sokatna man•gijanirangko manderang namen u•ia, maina bilsi 5-ni gisepo chadamberangna ge•saba sorkarini kamko on•na gita man•jajok. Ian MDA sorkarini dal•batgipa chu•sokatna man•gijani ong•a ine anga chanchia. Re•anggipa 2019 aro 2020 bilsio pulis battalion-na katgipa chadamberangni result-ko da•alonaba MDA sorkari parakatna man•jaha. Una agreba bang•a dingtang dingtang skul aro kolej-rango poraienggipa chatro chtrirangni scholarship mangmangkoba on•na man•jajok aro bang•a kam ka•giparangna dormaharangko on•na man•gijaniko A•chik a•songni manderang ba Meghalaya a•doko songdonggipa manderang nikaha aro dingtangmacha South Tura-ni manderang ma•sina ja•manchakja. Iandakgipa mandeko ba candidate-ko South Tura-o MLA ong•attaigenchimode, mikkangchi namjabatgipa obostaona soknaba gnang. Uni gimin bigita dal•gipa manderang baksa dakgrikanio, NPP-ni bang•a chu•sokatna man•gijanirangko nike, chinga namen ka•donga, chinga chechongmotgen aro uamangni tol•e ku•rachakgipa indin ong•gramaignok ine Brenzield Marak aganaha.
BJP India-ko sason ka•a aro bilaka, indiba BJP-ko dakgrikna India a•songo darang party-ba dongja, Congress party-na agrede. Da•alo TMC-ni manderang TMC-na agre BJP-ko warachakna Meghalaya a•doko aro India a•songo darang party-ba dongja ine aganenga. Indiba manderang u•ia, TMC-de West Bengal-osan bilakaia, West Bengal-na agrede, India-ni darang State-oba TMC-ko nikna man•jawa aro Meghalaya a•dokoba TMC bilakna man•jawa. Uni gimin TMC baksade, Congress dakgrikani ong•jawa. Apsandake India a•songo ba Assam-o BJP party sason ka•genchimoba, Garo Hills-o ba Meghalaya a•doko sasonona re•bana man•jawa. Uni gimin BJP baksa dakengon, dingtangmancha South Tura elakkaode, Congress altuen cheaigen ineba aganaha.
Batanggimin salrango je chadamberangan Congress-oni katangaha, uamangni katanganio Congress party-na aro South Tura-o dongenggipa chadamberangna mamingba neng•nikani dongja. Uamang gita tangkani gimin party-o napaigipa chadamberangni katanganichi Congress party namen bilakbataniko man•aha. Uamangni katanga ja•man bang•bata chadamberang Congress party-ona re•baskaha. Uamangni katanganio Congress party-na mamingba bilgriani dongja batesa bilakbatenga ineba Pa Marak aganaha.
NPP party Tura dingtangaha ine agana, indiba anga an•tangde Tura-ni dingtanganiko nikja, PA Sangma Stadium, jekon India sorkari National Games-ko sokachakna chamatgipa tangkachi PA Sangma Stadium ine bimingko donne rikaha. Da•alo NPP party Meghalaya a•dokko sason ka•e, ma•mong sorkarini chamatgipa scheme-ko jako ra•e, rikani giminsa da•onaba matchogijako nikenga. Indiba gipin dolrang rikgenchimode, national games-ko noksamtangon nikgenchim, indiba NPP-ni jako ra•e rikani a•sel da•alo stadium-ni chu•sokgijaniko nikna man•aha. Da•onaba matchotkugijagipa stadium-ko manderangna rasong dakna aro manderangna tol•e an•tangtangko develop ka•enga ine mesokna oprake on•aha. Oprake on•ani miksongara maia, an•ching nokko nokdonggaengon, nok matchotani ja•mano noknapnasa nokdonggaa, iakosa inauguration minga. Indiba da•alo matchotgijan inaugurate ka•jok. Inaugurate ka•ani ja•man da•onaba rikkuenga, indide, iara mai development ine angni sing•ani ong•gen. Apsandake Ganol Hydro Project-koba election-na mangmang an•tangtangni bimingko man•na matchotkugijagipa dam-ko salsana kachange, inaugurate ka•jok, indiba bilsisana baten rikna nangkugen. Inaugurate ja•man, mikjapsa Ganol Hydro Project-ni bijoli-ko niksona gita man•kuja. Iarang pilakan manderangko tol•e cha•bokna inaugurate ka•asan ong•aia. Una agreba Tura Smart Town-ko kror 700-na bate develop ka•aha ine ku•sikchde aganenga, bano NPP-ni development-ko nikgen, anga manderangna aganenga da•alo kror 2-na bate MLA scheme-rang donga, da•alo badiaba ramarangko tarie, iarang gimikan smart town-ni project-sa ine rasong dakenga, banoba rama dingsa tarigipaba smart town project-sa ong•genchimode, bilsiprako kror 2 bate man•gipa development scheme-ara bachi gimaskana nanga. Uni gimin “anga Skotong Minister Conrad Sangma-ko ra•bie agangen, anga South Tura-o MLA chegipa ong•ode, ramram MLA ong•oba, Minister ong•na man•jaoba Conrad Sangma-ni taptape development ka•mikana bate develop ka•gen” ine INC candidate ra•bie aganaha.