Tura, Feb 11, 2023: A•dokni kona noksik gimikchin, TMC Legislature Party-ni dilgipa aro warachakenggipa dolni dilgipa Dr Mukul Sangma tom•aniko ong•ate campaign-rangko ka•engon, salantian hajalni hajal manderang uni niksamsoe kam ka•anio bakrimtokenga ine parakataha.
Indake campaign-ko a•bachengatengon,Dr Sangma Sukrobar salo an•tangni elakka Tikrikilla-o dal•begipa tom•bimonganiko ong•atenba, NPP-ni dilenggipa MDA sorkarini chu•sokgijagipa kamrangko agan-talate on•angaha.
Tom•anio jinmana aganprakengon, TMC dilgipa Dr Sangma, MDA sorkariko “Bakki Party” ine aganskaha. “Bang•a bilsirangna chingni MDC-rangna dormaharangko on•na man•gija donenga. MDC-ranga Bakki sorkari ong•jama? Unbaksana, GHADC-o kam ka•giparang bilsi 3 batpile uamangni man•gni tangkarangko man•jaha. Ia obostako sakantian nikaha, sawa “Bakki Sorkari” ine Dr Mukul Sangma sing•doangaha.
NPP-ni dilenggipa MDA sorkari a•dok gimiko lekka paraniko bon•chipataha, ine aganangengon, “Skigiparang pension ong•ani ja•mano gital skigiparangko kamo rakkijaha, uni a•sel skulrangko chipna nangani a•sel bang•a poraigipa bi•sarang skul poraina man•jaha. Indide iara sorkarini kam-ma” ineba sing•doangkuaha.
Tikrikilla-ni TMC candidate Dr Mukul Sangma, indakeba aganaha, MDA sorkari Pension Scheme-koba bon•ataha. “Anga angni somoio budepa butchumarangna aro segri me•chikmarangna gong 500-ko pension on•na a•bachengaha. Indiba MDA sorkari da•alonaba umangna on•enggipa pension-ni tangkako bariatjaha, tangka bariatani pal.batesa manderangni pension-ko bon•srangjok” ine Dr Sangma MDA sorkariko matnangaha.
“Iandakgipa kamrangara a•dokko saaon ka•gipa sorkarini kam ong•ama? MDA sorkari Garo Hills aro Meghalaya-ni manderangko cha•bokaha. MDA Sorkari an•tangtangni kamko ma•sijaode, chinga uamangko sorkari rikna on•kugenma” ineba Dr Sangma sing•aniko dakangaha.