TMC youth dolni ong•atanggipa Inter Mahari Football Tournament tom•tome matchotanga 

Resubelpara, Sept 11, 2022:North Garo Hills a•jani Resubelpara Elakkao skanggipa changna Inter-Mahari Football Tournament 2022-ko North Garo Hills, Resubelpara Youth Trinamool Congress, Dekachang Kal•chakram biapo ong•atanggipa September 10 tarik Sonibar salo name aro tom•tome matchotangaha.

Ia kal•susaanio dol 48 dingtang dingtang Maharirang bakko ra•angaha. Indake bon•kamgipa kal•susaanio Gabil Mahari FC baksa Nengminja Mahari FC kal•susaangha, jeon Gabil Mahari FC goal 3, Nengminja Mahari FC goal 1-ko chipaha, indake Gabil Mahari FC, Nengminja Mahari FC-ko goal 2-chi amataha.

Ia bilsini Resubelpara Elakkao Gabil Maharirangan Robol kal•susaanio Champion ong•aha. Ia kal•susaanio Kharkutta Elakkani gitcham MLA aro MDC Cherak W Momin baksa Rongrong Elakkani MDC aro Resubelpara Elakkao MLA susana am•enggipa Rinaldo K Sangma. Bajengdoba Elakkao MLA susana am•enggipa Howchistar B Marak mongsonggipa sokgipa ong•e, kal•susaaniko mikkim gnangataha.

Indake ia bon•kamgipa kal•susaanio Cherak W.Momin mongsonggipa sokgipa ong•e, kal•susaanio bakko ra•anggipa Maharirangko mittele aganangaha aro kal•susaanio chegiparangna boksisrangko suale on•angaha.