Tura, July 12, 2022:East Garo Hills a•jani Rongjeng elakkao Meghalaya Pradesh Trinamool Congress (MPTMC), Rongjeng Block Committtee Formation and Block Level Event-ko Monggolbar salo ong•atangaha.
Ia tom•anio Rongjeng jolni bang•bea manderang bakko ra•angaha, unbaksana Meghalaya a•doko warachakenggipa dol aro AITC-ni dilgipa Dr Sangma mongsonggipa sokgipa ong•e, tom•aniko mikkim gnangataha. Unbaksa dongpagiparanga Chokpot-ni MLA Lazarus M.Sangma, Rongrong-ni MDC Rinaldo K.Sangma, Williamnagar MDC Alphonsus R.Marak, Samanda MDC Lahitson M.Sangma, Rongjeng-ni gitcham MLA Sengnam Marak, East Garo Hills-ni TMC dilgiparang aro songni nokni manderang bakko ra•angtokaha.
Dr.Mukul Sangma tom•anio dal•batgipa sokgipa ong•e, jinmana aganprakengon, namatna man•jaenggipa sima arini kajia golmalko namatna gita re•anggipa March 29 tariko Meghalaya aro Assam a•dokni Skotong Minister Conrad Sangma aro Himanta Biswa Sarma Memorandum of Understansding (MoU)-o soi ka•grikani a•sel adita A•chik songrangko Assam a•doko chapatani gimin, Assam a•dokchi re•angnasikgijagipa Meghalaya a•dokni manderangko Assam pulisrang namen sinjetanirangko dakenga aro dos gri A•chikrangko rim•e pattok chipe donenga ine Meghalaya aro Assam a•dok sorkarini kosako Dr Mukul Sangma raken jegalangaha. Uni gimin re•baenggipa 2023 bilsini eleksino TMC sorkariko rikna man•ode, soi ka•gimin MoU-ko ra•galgen ine jinmana parakangaha.
Una agreba Old Age Pension-ko man•enggipa budepa butchumarang re•anggipa 2016-2019-ona man•ani ja•mano da•alona kingkingba man•chipgija donengani gimin MDA sorkarini kamko Dr Sangma jegalataha.
Minggipin MDA sorkarini chu•sokatgija galchipe donenggipa Tura Medical Kolege aro Mawlai Engineering Kolege-ko rikchipgija donengani gimin, ua kolege-rangna chamatgipa tangkarangko bachi gimaataha ine Dr Sangma sing•doangaha.
Unbaksana GHADC-o kam ka•giparangni dormahako bilsi 3 batpile on•gija donengani gimin, aganengon GHADC-ni pilak man•gni kajinarangko Conrad Sangma ra•gope an•tangni namgnina jakkalani a•sel kam ka•giparangni dormaha on•na man•jaenga ineba matnangaha.
“Angni Skotong Minister ong•mittingo Ma•mong sorkari GHADC-ko namdapatna tangka gong kror 100.71-ko 2015-2016 bilsio watataha, ua tangkarangko MDA sorkari bachi gimaatjok ineba Dr Sangma MDA sorkario sing•doanagaha.
Uni gimin mikkangchi A•chik jatko cha•bokgipa, jatna ka•sagijagipa party-ko sorkari rikna on•kugenma, “an•ching simsakna aro Meghalaya a•doko dingtanganiko nangchongmotengjok, uni gimin an•ching ku•monge, BJP, NPP, UDP, HSPDP, PDF aro NCP-ko warachakanide AITC dolsanjok ineba ua agandapangaha.