Shillong, Oct 11, 2022: Meghalaya TMC-ni State President a•bri maldoe sianggipa nokdangni manderangko gronge kalimpaaniko on•angaha.
Meghalaya TMC President, Charles Pyngroppe Sombar salo a•bri maldoe sianggipa Tiklu Jyrwa-ni nokdangona re•ange kalimpaaniko on•angaha. TMC dilgipa Upper Lumparing Shillong-o donggipa Jyrwa-ni nokona re•ange nokdangni manderangko gronge duk ong•rimpaaniko dakangaha.
“Angni gisik ka•tong gimikchi sianggipa Tiklu Jyrwa-ni nokdangna kalimpaaniko on•pana sika. Nangni namgipa kamrangko Meghalaya-ni manderang pangnaba gualjawa, nangko gisik ra•gen” ine Charles Pyngrope tweeted ka•ataha.
Meghalaya a•dokni bilsi 35 ong•gipa Tiklu Jyrwa October 8 tariko a•gilsakko watangaha. Ua October 4 tariko Uttarakhand a•dokni Dokriani Bamak surini a•briko maldoangmitting somoio rang•san tin•kagipa surirang jo•oldape janggitangko gimaataha.