Tura, Jan 19, 2023: Meghalaya a•doko dingtanganiko ra•bana aro TMC sorkariko rikna re•mikkange kamrangko ka•engon, North Garo Hills a•jani Mendipathar Dilma Secondary Skul kal•chakramo TMC dal•begipa tom•bimonganiko January 18 tarik Budbar salo ong•ate Garo Hills-ni manderangko ku•mongangaha.
Ia tom•bimonganio AITC-ni Chairperson aro West Bengal-ni Skotong Minister Mamata Banerjee mongsonggipa sokgipa ong•e bakko ra•angaha. Unbaksa gipin AITC-ni dilgiparanga National General Secretary Abishek Banerjee, Rajya Sabha MP Derek O’Brien, AITC Meghalaya State incharge Manash Bunia, State President Charles Pyngrope, Warachakenggipa dolni dilgipa Dr Mukul Sangma, district aro block level-ni dilgiparang, TMC candidate-rang dongpae bakko ra•angtokaha aro TMC-na chakgipa bang•a manderang gital sorakrina ma•ringenggiparang sak hajal 50,000-na bate bakko ra•angtokaha.
Ia tom•bimonganio Mamata Banerjee mongsonggipa sokgipa ong•e, jinmana aganprakengon, “Anga Meghalaya a•doko sason ka•enggipa, ‘double engine’ sorkari BJP aro MDA Proxy sorkarini gimin talatna re•baha. Anga dingtangmancha na•simangko nike ka•sroka aro kusi ong•a, indiba anga da•alo dingtangmancha na•simangni ku•sikchi aganna man•ode kusi ong•begenchim. Anga changgipino na•simangni ku•sikko skina jotton ka•gen. Angni ka•sagimin a•dokna chigana, kam ka•na skango political daito ra•e Congress dolo kamko ka•engon, Congress dolara bilgripa ma•giparangko sinjetanio, gipin dolrangni sinjetanio kakket ong•e matgrik gita warachakgipa ong•jani gimin, anga Congress doloni ong•kate gitalgipa party-ko bikote, TMC-ni plateform-ko a•bachengatna man•aha. Da•alo dingtangmacha iako dake a•dokni manderangna, pilak jatrangna, bilgrigiparangna, ma•giparangna, chadamberangna kamrangko ka•na gita cholrangko man•aha. Anga sorkariko chalaie West Bengal-o bilgrigipa manderangnasan ong•aigija population kror 10 donggiparangoni kror 9 atanade indin cha•anirang mirong aro dalrangko on•enga. Una agreba ka•tongni sabisiko man•ne, sana bananiko dakna bang•a tangka paisarangko nangenggipa sak hajal 60,000 dedrangko indin operation ka•e sanna bananiko on•enga. Una agreba poraienggipa chatro chatrirangna dingtangmancha dal•a gadangona poraianiko dakchakna, Smart Card-ko on•ne, lak 10-ona kingking loan-rangko ra•dape poraina man•na gita dakchakaniko on•enga. Unbaksana dingtangmancha ma•giparangna Laksmi Bhandan-ko dake nokantini ma•giparangna account-o tangka sokatgipako, da•o Meghalaya-o dakna am•enggipa WE card gita apsanko dake jaanti ma•giparangni account-ona tangka chipate dakchakaniko on•enga. Apsandake Meghalaya a•doko TMC sorkariko rike a•dokni manderangna dakchakaniko on•gen. Angni a•doko sinjetaniko man•oba dondikgija krenge kamrangko ka•anichi, a•dokko niksengatna man•enga. Uandake, na•simangba a•doktangko niksengatna ka•kim chagiparang ong•na, uni gimin na•simangni krenganio TMC na•simang baksa ong•gen. TMC-ni symbol-ara samsi bibal balgni, ia bibal balgniara ma•gipa-pagipa aro adatang nogipa gita ong•a aro an•chingni apsan ku•monganiko mesoka. Samsi bibalo donggipa ge•gitam chinara Garo, Khasi aro Jaintia a•bri ge•gittamko mesoka. Uni gimin da•alo ia re•mikkanio gipin dolrang an•chingni manderangko majogen, tangka paisarangko BJP bang•en chimongaha. tangka paisachi majona jotton ka•gen, an•chingni miksonganiko bilgriatna aro olgrokatna jotton ka•gen. Indiba an•ching kim•kim ong•na aro an•ching kim•kime ia Proxy sorkari BJP aro MDA sorkariko Singhason-oniko ra•gale, TMC sorkariko rikna, TMC-ni bilchi aro an•chingni bilchi TMC-ko bilakatna aro ia bilchi an•chingni jat aro a•songko rikna gita jakkalna. Angni ku•monganirango dingtangmancha pilak janggi tangani cholrangko chadamberangna aro cholgrigiparangna on•giparang, angni West Bengal-o 40% na bataha. Apsandake Meghalaya-oba jatna aro a•songna ka•sae, Meghalaya-ko mikkim gnangate rikgen, uni gimin, hai an•ching TMC-ko bilakatna aro electiono an•chingni ku•mongani bilchi Meghalaya-na kakket ong•e kam ka•na” ine aganangaha.