Ampati, Aug 27, 2022: South West Garo Hills a•jani Salmanpara elakkani ning•o donggipa Bandalkona skul kal•chakram biapo TMC Sukrobar salo tom•bimonganiko ong•atangaha.
Ia tom•bimonganio TMC dilgipa Rongsakona-ni MLA Pa Zenith Sangma mongsonggipa sokgipa ong•e bakko ra•angaha. Unbaksa gipin TMC dilgiparanga Mahendraganj-ni MLA Ma Dikkanchi D.Shira, Salmanpara MLA Pa Winerson D.Sangma, Dengnakpara-ni MDC Ma Sadhiarani Sangma, Betasing MDC Pa Sanjay Koch, gitcham Minister Pa Adolf Lu Hitler R.Marak, South West Garo Hills a•jani TMC dilgiparang aro bang•a manderang tom•anio bakko ra•angtokaha.
Zenith Sangma tom•anio jinmana aganangengon, NPP-chi chalaienggipa MDA sorkari maiko dakenga an•ching nina nangjawama, ja•ku sanne nina nanggen. Da•alo an•ching ja•ku sanne niatgenchim ong•ode, Pa Conrad Sangma-ni Skotong Minister ong•a intal maiba mingsamai mingnamgipa, gamchatgipa aro niksenggipa Project ge•samaiko A•chik a•songna ra•bajokma dongkuja ine aganangaha.
MDA sorkari namgipa projectrangko ra•baanide chel•ahajok, batesa a•songko so•sojengjeng ong•ate a•songko rusiroroenga. Corruption-na agre maming kam dongja, department ge•antion corruption, amsokpilgija aiao inmanpilgipa corruption-rangko da•alo nikna man•enga. Chasongnaba indakgipa corruption ong•aniko department ge•antio nikkujachim. An•ching bilongen rasong griachi, Pa Conrad Sangma-ni Skotong Minister ong•a ja•man dugapile tangka cha•ana agre corrupt practice ka•ana agre maming kam donggijako nikna man•enga ine Pa Zenith Sangma MDA sorkariko matnangataha.
Da•alo ia corrupt practice-o tangka paisarangko niamgri chimonge, ia tangkarangkon vote pu•ongiparangna on•ne, tangkani Gulam ong•atna jotton ka•enga. Indiba je manderangan tangkachi man•angna jotton ka•a, ia maming saloba jatna ka•sae kam ka•gipa ong•ja. Tangkachi MLA man•angjokode bilsi bonga kusi ong•e dongaigen, eleksin sokbajokode tangkachi vote man•na jotton ka•pilaigen. Uni gimin da•alo strong message-ko on•atna nangenga, an•ching politician-rangko Lesson Skina nanggen, je politician-rangan jatna ka•saja, songna nokna develop ka•na gong•ja tangkachirara vote-ko man•na am•a, uamangna lesson skina nanggen, jatna ka•sagijagipa, develop ka•gijagipa aro manderangna somoi on•gijagipa manderangna vote pu•onjawa, jegitaba tangka on•bo ine on•na ong•ode, tangkararachi cholijaha, kam ka•na, develop ka•na, manderangna ka•sana nanggen ine politician gimikan ia lesson-ko man•gen ineba Zenith Sangma aganangaha.
Dr Mukul Sangma-ko ma•sigijagipa darangba dongja, uni MLA chakatchengaoni da•alona kingking changdok (6) joljol MLA seokako man•ne, dingtang dingtang gadango dangdike on•aha. Uni Minister ong•daldalo bang•a development-ko ra•baha. Uni PWD Minister ong•mittingo maiko daka, Ampati-o PWD division dongjachim, contractor-rang Barenggapara-chisa bill-na re•angna nangachim, a•jatang Ampati-on PWD Division Office-ko kulijok. Indakgipa office-rangko kuliode economic tang•doaia aro manderangni janggi tangani gadangba tang•doa. Ampati-o PHE division dongjachim, kulie on•jok, Ampati Civil Hospital-o pallang ge-100-ko kulie on•jok, district on•jok, pulis station dam 18-ko uni Skotong Minister ong•mittingo sanction ka•e on•jok ineba aganangaha.
Da•o Assam aro Meghalaya sima ario donggipa manderang maidakgipa dukrangko chagrongenga, maini gimin mikchi ong•enga, je a•a chiako an•chingni ma•gitcham pagitchamrang donangahachim, uko alturiri Assam-ni Skotong Minister-ni tarigimin agreement MoU-ko mamingkoba nicheng nikchenggija, poraie ma•sichenggija re•angari soi ka•e donani a•sel da•o mai obosta ong•ataha. Jegita aganoba manijaenga, uni gimin Dr Mukul Sangma-ni dilanichi TMC eleksin ja•man mikkang bilaio sorkari rikgen. Dr Mukul Sangma Skotong Miniater ong•gen aro ia MoU-ko chinga ra•galgen ine Dr Sangma gimikon aganprakenga, indiba da•alo Dr Mukul-ni palo anga na•simangna aganangenga. Je MoU ba Agreement-ko soi ka•e, A•chik ma•gipa pagiparangko brangatengachim, uamangni a•ako ra•sekdrae Assam-chi watatengachim, Uko Scrap Ka•gen ba Den•galgen, TMC sorkari rike Dr Mukul Sangma Skotong Minister ong•joko. Uni gimin jatko naljokatna, jatko chel•chakna, jatni mikchiko rippake galna sakantian kamko ka•na nanggen. Uasan ong•ja,mijamangmang na•simang knaenggen, Tikrikilla aro Raksamgre jolrango mai ong•aha, GHADC-oba NPP, State-oba NPP ong•e, B-Mahal-ni a•ako hecter 2000 ba bigha hajal 15-ko District Council pale cha•jok. District Council-de a•ani nokgipa ong•ja, Conrad Sangma aro a•dok sorkariba a•ani nokgipa ong•ja, a•ani nokgipa A•kingni ning•o ong•ode Maharisa A•kingni nokgipa ong•a. Ia B-Mahal-o Nokma gatkuja, an•chingni A•chik a•songo songdonggipa manderangni a•a, iano baditaba songni a•ako nangai nangjai jatko brangatna pale cha•aha. Bang•a manderang bagan bari dakjok, nok jam rikjokchim uamangko brangatengjok, ia manderangni mikchiko niatjawama. Uni gimin ia namen chanchina nanggipa kamrang ong•a, sakantian chanchie kam ka•na nanggen ine Zenith Sangma tom•bagipa sakantiko ku•mongangaha.
Kror 2000-na bate tangkarangko ra•bajok PMGSY ramarangko tarina, Jal Jeevan Mission (JJM)-na kror 2000-na bate bilsibrini gisepo ra•bajok ine Conrad Sangma a•kangenga. Ia minggniko aganne Rangatari-o meeting ka•e bon•atjok. Ia PMGSY-de ma•mong sorkarini scheme-sa, iade Meghalaya-osan ong•ja, Assam-o, Nagaland-o Arunachar Pradesh-o, Bihar-o, West Bengal-o, UP-oba gimikon ia scheme-de sokenga. Iade India sorkarini scheme. Jal Jeevan Mission, ghar ghar main nal, ine slogan-ko on•ne Narendra Modi a•bachengdiljok, pipe nol-ko nokantina sokatoba chian tottakjaode orto dongja. Chiko tangkachi tarina man•ama man•ja, chide natural source dongna nanggen.Iarang gimikan, mind game, aiao nokantiona chi joksalatna pipe tekengjok ine India a•song gimikni manderang namnike BJP-na vote on•china Narendra Modi-ni tarigipa scheme. Iani ning•o sokbagipa Ma•mong sorkarini tangkasa, ia minggniko aganne rasong chana am•enga. Ia Ma•mong Sorkarini scheme-na agre Conrad Sangma na•a A•chik a•songna aro Meghalaya a•dokna maiko dakjok, iakosa aganboda, anga Conrad Sangma-ko sing•na sikenga. Uni gimin, Hindi-o agana donga, ‘Dimak ka bathi chalade’ ian an•ching gisik seng•na nanggen. Da•alo NPP mamingkoba dakjaenga eleksin sepangoba, ex-MLA, sitting MLA-rangko tangkachi breenga, iarang gimik ong•enga obostarangko nike, Khasi Hills-ni manderang Dr Mukul-ona re•bae aganenga, ia dilgiparang an•tangtangko palbadingenga, na•simang jajrengnabe na•song gimikko niwilwale mande namako party tikit on•ne watataibo, chinga na•simang baksa donga, chinga dingtanganiko nanga, jedakeba corrupted ong•gipa aro a•songko pale cha•gipa sorkariko tang•galna nanga ine agantokenga ineba Sangma aganangaha.
Uni gimin a•dokni manderang an•ching baksa, an•chingara nangko angko sanalgrike ba jerikkie donggenma, a•songko chalainade dilgipao pangchakgen, Dr Mukul Sangma maidakgipa mande sakantian ma•sia, uni gimin hai apsan sko dondime jatni namgnina, jatko warachakna aro Meghalaya a•dokni ong•sianganiko tang•doatpilna jakko snilate namgipa leader-ko mikkang bilsi eleksino seokangna ineba Zenith Sangma ku•mongangaha.