A•dokni bang•a NGO-rang MoU-ko jegale uamangni chanchianiko parakata 

0

Tura, August 25, 2022: Association for Democracy and Empowerment (ADE)-ni President Dalseng Bira Ch. Momin, “Chingni u•iani gri, chingni mittino Amani a•arangko pale cha•nabe” ine aganenba MoU-ko jegalangaha.

NGO-rang banner-rangko de•doe a•dokni Skotong Minister Conrad Sangma aro Assam-ni Skotong Minister Himanta Biswa Sarma-ni March 29 tariko soi ka•gipa Memorandum of Understanding (MoU)-ko jegalangaha.

MoU-ko jegalangengon, ADE-ni President, “A•dokni Skotong Minister Conrad Sangma, an•chingni Aman a•songko gipinna pakwate on•na maming bil dongja. Uamang songni manderango maming sing•sandia gri Meghalaya a•dokni a•arangko Assam a•dokna pakwatangaha, ian “Dictatorship” ni kam gita chacha ong•a. Chinga A•chik, Khasi aro Jaintia apsan nangrime Skotong Minister Conrad Sangma-ni kamko ra•chakna manjawa” ine jegalangaha.

Joint Action Committee-ni Chairman ba ADE aro FKJGP dolni jegalanganio bakrimpaangaha, unbaksana a•dokni bang•a NGO dolrangba bakko ra•angaha. Unbaksana Assam aro Meghalaya a•dokni sima arini kajia golmalko namatna gita uni chanchianirangko jinmana parakangaha.

“Sixth Schedule-ko niatgenchimode, a•ani nokgiparang an•chingsa ong•a, sorkari an•chingni a•ani bidingo maming raiko ra•na man•ja. Indide CM Conrad Sangma-ara maina Khasi aro Jaintia Hills-ni boundary-o pangchake soi ka•jaha. Sixth Schedule-ko 1952 bilsio ra•gataha. Indake 1952 bilsini June 27 tariko Khasi aro Jaintia Hills-ko songaha” ine Joint Action Committee-ni Chairman parakataha.

Unbaksana Jaintia Hills-ko sason ka•anggipa Raja Jaintia-ni a•arang maikai Assam Territory-ni ning•osa ga•akaha uarangko agantalate on•angaha.

“Conrad Sangma-ni dilanichi rikenggipa MDA sorkari aro dolni manderang sima arini obostako namatna man•e katchatokenga. Indiba uamang ia kamko ka•angna aro ja•ku de•na skang maming dakeba songni manderang baksa golpogrikjaha aro uamangni raiko ra•jaha. Uni kamara Sixth Schedule-ni niamko pe•a gita ong•a. “Anga Khasi jatna dingtang a•dokko dabiangna miksonge MoU-ko jegalenga ong•ja. Indiba Khasi a•ja jekon Nonglang Syiemship aro Myllien Syiemship jekai Nongwah, Mawtawar Syiemship-ni ning•o ga•akachim, ua a•arangko Assam a•dokna pakwatanganiko naljokatnasa jegalenga. Uasan ong•aigija Garo Hills a•jani bang•a a•arangba Assam a•dokni ning•o ga•akangnok. Uni gimin an•ching man•a dipetde jinma apsan nangrime MoU-ko jegalangchongmotna nanga” ine Chairman agandapangaha.

FKJGP Garo Hills Zone-ni President Pritam Arengh, sit in demonstration-o bakko ra•anggipa dol 6 Organization-rang FKJGP, ADE, FAF, AYWO, NGCO aro Mallangkona Joint Action Committee-ko jinmana u•iatangaha.

Re•anggipa March 29 tariko soi ka•gipa MoU bang•a manderangna neng•nikaniko ra•baaha, uarangko aganangaha. West Khasi Hills a•jani bang•a songrang jekon Nongbak aro Hima Nongkhlaw sason ka•engachim, uamangni u•ia ma•sia gri Conrad Sangma gipin a•dokna pakwate on•angaha.

MoU-ko “Panchasutra” ba ” Ming bonga niam” jeko agangenchimode ” Itihas ba Historical Background”, “Jatni dakbewal, rikbewal ba Ethnicity”, ” Chengoni ong•baenggipa aro dongkuenggipa biaprang ba Geographical Continuity “, “Manderangni rai ba Willingness of the People ” Ia ming bonga niamrango pangchake soi ka•aha ine Skotong Minister u•iataha. Indiba niatgenchimode, Conrad Sangma soi ka•na skang batanggimin salrangko nipilatjaha aro chengoni itihas-ko nipilatjaha. Mallangkona songni manderang changni chang re•jome MoU-ko jegalengaha, indiba sorkari on•tisaba uamangni chrik a•bokaniko knachakja ine Pritam Arengh aganaha.

Niksamso Garo Community Organization (NGCO)-ni membor saksa Tengrak Marak, Meghalaya a•dokni pilak manderang jinma apsan ku•monge MoU-ko jegalna didiangaha.

“Meghalaya a•dokni jat ge•gittam jakgitelna dakgrikanio bakko ra•gipa manderang gnang. Uni gimin an•ching Meghalaya a•dokni manderang ku•cholsan ong•e, damsan ja•ku ga•e MoU-ko jegalangna nanga” ine Tengrak Marak aganaha.

Leave A Reply

Your email address will not be published.