Shillong, January 24, 2022: Meghaalaya TMC-ni indin sualenggipa WE card aro MYE card-ko NPP bakki card ine parakatskaha.
TMC-ni on•enggipa card nokdangantini me•chik sakprakna jaanti tangka gong 1000 ka•e, bilsi gimiko gong 12,000-ko on•na ku•chakaniara indin ong•gramaigen NPP dol parakataha.
A•doko lak 7-na baten nokdangrang gnang aro state fund-na gong kror 840-na baten tangkarang koros ong•gen.
Iana agreba, Meghalaya Youth Empowerment (MYE) Scheme-ko bilsi 21-oni 40 ong•gipa kam gri dongenggipa chadamberangna japrako gong 1000 ka•e, bilsi gimiko gong 12,000-ko on•na ku•chakenga iarangko TMC on•na man•genma ine NPP dol sing•doangaha.
A•doko bilsi 21-oni 41-ona ong•gipa manderang sak lak 11 mang donga, uamangoni 50% kam grigipa ong•genchimoba, kror 700 tangkarangko nanggen. Gong kror 1500-ni korosrang, a•dok sorkarini korosrang 50% ni gita ong•a, chu•gimik koros 15,500 kror-ang ong•a ine NPP dol koborna u•iataha.
Niatgenchimode, ia ku•chakanirang maming pangchakani gri aro ong•na amgijagipa ong•a. TMC ku•chakaniko chu•sokatna gita sandirikkitanirangko dakmanaha ineba sing•doangaha.
TMC ia scheme-ko West Bengal-o chu•sokatnaba donga. West Bengal-o Womens’ Empowerment Scheme-ni koros gong kror 13,000 mang ong•a aro gong kror 1.6-ni namgnirangkosan manderang man•enga.
Indiba opposition-ni dilgipani agana gitade, gong kror 5 me•chikrangna ku•chakaoni gong kror 1.6 me•chikrangnasan man•gnirangko on•ne, uni election-na skang ku•chakgimin kattako pe•aha ineba NPP jaksi otaha.
Lakshmi Bhandan Scheme-o biming segatanirangko songrango camp-rang ong•atanichisa dakna man•enga. Ia camp-rang a•dokko chalaigiparang ong•atgija, party-ni manderangsa ong•atenga aro ia scheme-ni gita online registration ba BDO-rangna dorgasto galna on•ja. Iako dakani miksongara party-na chakgipa manderangnasan namgniko on•ne, uamangoniko vote-rang man•skana dakanisan ong•aia.
West Bengal-ni bang•a TMC MLA-rangko Skotong Minister Mamata Banerjee, an•tangtangni elakkarango kam ka•ani bidingo nipilna tom•anirangko ong•atanio manengako man•aha aro uamangna pu•ongiparang kusi ong•jaenga, maina MLA-rang an•tangtangni nangnikaniko on•na man•jaenga ine uamang an•tangtangan parakaha.
West Bengal sorkari 2022-23-ni budget statement-ni gitade, 2010-11 bilsirango gong kror 19,500 fiscal deficit, man•ana bate koros ong•ani, 2021-22 bilsio TMC-ni sasono gong Kror 53,431-ona tang•doaha, jean 300% ong•nasiple bariaha. Ia deficit-rang loanrangko ra•ani gimin ong•aha ineba janapataha.
Meghalaya-na a•paloniko loan ra•anirang mongsongbate 90% ma•mong sorkarini ong•a aro uko agency bank-rang namedake nirokata. Uni gimin, loanko ra•na gita, ma•mong aro a•dok meli-nangrime project-ko matchotatna nangchongmota.
NPP MLA Marcuise N Marak, “Dr Mukul Sangma-ni sorkari 2010-18-ona chalaianio M-LAMP project-o sakkiko mesokaha. Tangka on•timgipa IFAD ia project-ko 2018 bilsio kam ka•gija donani aro tangkarangko jakkaljani a•sel chipna nangahachim, indiba da•o ia project-ko namen kam ka•enga” ine parakataha.
NPP-ni dilenggipa MDA sorkari gong kror 10,000-na baten, a•palchiko tangkarang man•baha, jean 2018 bilsio gong Kror 2,300-san ong•aiachim.
Ia scheme-rang je sorkarninaba neng•nikaniko on•a, indiba political analyst-rangni dakchakachi ia scheme-ni neng•nikaniko namatna man•ja. Iarang mongsongabate an•tangtangko niksengate, social media-rango chonnike roani aro party-ko matnangna tariasan ong•aia. Da•o Dr Mukul Sangma ia bakki card-ni bidingo sing•anirangna maiko aganchakgen aro manderangni dakchakaniko man•na krenganiko nina nangengkua ineba Mercuise Marak janapataha.