Tura, September 6, 2022: Trinamool Congress (TMC), Monggolbar salo West Garo Hills a•jani Gambegre elakkao Block Level Meetingko ong•atangaha.
Ia tom•anio Magendraganj-ni TMC, MLA Dikkanchi D. Shira, Rangsakona MLA Zenith M Sangma, Chokpot MLA Lazarus Sangma, Salmanpara MLA Winnerson Sangma, unbaksana Kharkutta MDC MDC Cherak W Momin, Amongpaea MDC Nehru D. Sangma aro Dengnakpara MDC Sadhiarani Sangma bakko ra•angaha.
Me•chikmarangna MDA sorkari maming dakchakaniko on•jaengani gimin, Zenith Sangma “Batanggimin MUA sorkariko Dr. Mukul Sangma-ni chalaimiting somoio, me•chikmarangna tangka gong hajar 5,000-ko on•enba uamangna dakchakaniko on•achim, indiba Conrad Sangma ia scheme-ko bon•chongdikataha. Assembly-o JICA-ni tangka paisarangko batchi maidake bon•ataha ine sing•anina uamang da•aloba maming aganchakaniko on•kujaenga. Indake eleksinna adita ja skang MDA sorkari, ua apsan hajar 5,000 tangkako FOCUS Scheme-ni gita suale on•skaa dakenga. Ua tangkarang NPP sorkarini tangka ong•ja, indiba ma•mong sorkarini tangkasa. Ua tangkarang Tax gamgiparangni tangkasa, NPP sorkarini ong•ja” ine aganangaha.
Dr. Mukul Sangma-ni chasongo ua Chief Minister’s Social Assistance Scheme-ko bikotaha, jekon ua ma•mong sorkarini tangkachi ong•gija, a•dok sorkarini tangkachisa chalaiskaha. Indiba Conrad Sangma ua scheme-koba bon•chongdikataha ineba ua agandapangaha.
MDC Sadhiarani Sangma, MDA sorkariko matnange aganengon, “NPP sorkarini rikenggipa MDA sorkari, an•chingko bilsi brina kingking cha•bokenga. Uamang a•dokko tang•dodapatna maming nama kamrangko ka•kuja, Gambegre-ko niatgenchimode, uamang maming kamkoba bilsi brina kingking ka•jaha” ine aganaha.
Indake ia tom•anio bang•a manderang bakko ra•angenba Trinamool Congress-na chakpaaniko mesokangaha.