Ampati, September 7, 2022: Meghalaya a•dokni bilsi 50 gapani chinko mesoknagita, September jani 6 tarik o District Administration aro District Sports officeni dilgiparang apsan nangrime Cycle salsusaaniko South West Garo Hills a•jani skotong songjinma Ampati o ong•atangaha. Ia cycle salsusaaniko Ampati Mini Stadium oni a•bachengataha.
South West Garo Hills a•jani Deputy Commissioner Gideon Kharmawphlang, cycle salsusaanina flag de•doe on•angaha unbaksana bakko ra•enggipa pilak manderangko kimkime salchina aro saksa sakgipinko a•sel ong•atgrikjachina didiangaha. SWGH ni DC dongan baksana, flag dedoanganio Ampati ni ADC P K Sangma, District Sports Officer S M Marak, Ampati ni SDSEO E Ch. Marak maangba dongpae bakko raangaha.
Additional Deputy Commissioner P K Sangma, me•a aro me•chik category rangoni chegipa rangna medal aro cash prize rangko suale on•angaha. Me•a aro me•chik category rangoni chegipa na , Skanggipa, gnigipa aro gittamgipana tangka gong hajar 15, hajar 10 aro hajar 5 ko sulsul dake suale on•angaha.
Me•asarangni Category o Kolkatola songni Niksrang R. Marak skanggipa ong•aha, Digilakona ni Jeckison Ch Sangma gnigipa aro Tebronggre ni Batsrang A Sangma gittamgipa ong•eaha. Me•chik Category o Walbakgre ni Smile Orchid M Momin skanggipa ong•e cheaha, gnigipa o Kolkatola ni Sulitha B Sangma, aro Jangnapara ni Josina B Marak gittamgipa ong•skaha.
Me•a aro me•chik gegni category rangoniko sak 7 manderangko seoke chugimik sak 14 manderangna consolation prize koba on•angaha.