Tura, August 7, 2022: West Garo Hills a•jani District Horticulture Officer, Spice Mission-Spice Development Scheme 2022-2023-na August 5 tariko Rongram Horti Hub-o tom•aniko ong•atange namgipa gulmoris-rangko suale on•angaha.
Ia tom•aniona Chief Minister-ni Adviser Thomas A Sangma baksana Selsella-ni MLA Ma Ferlin A. Sangma mongsonggipa sokgipa ong•e bakko ra•angaha. North Tura-ni MLA Thomas Sangma, elekkatangni ning•o donggipa manderangni gulmoris ge•e chu•sokaniko jinmana aganprake on•angaha.
Garo Hills a•jani a•arang gulmoris ge•na namgipa aro a•sal gnanggipa a•arang ong•a. Uni gimin a•sal gnangipa a•arango an•ching gulmoris-rangko ge•e an•tangtangni janggi tanganina cholko ra•china jinmako didiangaha.
“An•ching a•dokni Skotong Minister Meghalaya a•dokko India a•song gimikoni nambatsranggipa aro ga•subatsranggipa dam 10 a•dokrango bakko man•epana niksamsoanirang gnang indakgipa ja•kuko de•enga” ine Thomas Sangma aganangah.
Apsandaken Ma Ferlin Sangma, Spice Mission-ko a•dok sorkari an•chingna tarie on•aha jedakode sorkarini dakchakaniko man•ne ge•e game cha•enggipa manderang an•tangtangna janggi tangani cholko tarie ra•na gita man•gen.
Indake ia tom•anio WGH a•jani Horticulture Department-ni Assistant Director Paulette A Sangma key note address-ko aganangaha, uandake Joint Director rimchaksoani kattarangko aganangskaha.