Ranikor, June 20, 2022: South West Khasi Hills a•jani ning•o ga•akgipa Gilagora songni manderang mikka jimbee waanichi chi banani a•sel nok jamrangko gimaatan baksana pilak cha•a ringanirangko gimaataha ine All Khasi Hills A•chik Federation (AKHAF)-ni Publicity Secretary Sanggra Marak u•iataha.
“Gilagora songni bang•a nokrangko chi man•pakange nok gri jam gri buringrango dongna nangenga. Uamangni salantio cha•enggipa mirong michu, dal, na•kam-kari, chini, ring•ani chi, dongchakani nok, bijoli aro mobile network gri dongna nangenga. Bajar antio palna chimonge dongipa mirongrang aro gipin bosturang chi bananichi nosto ong•ako man•aha.
Unbaksana NH Baghmara-oni Ranikor-ona re•gipa ramao a•arang rudape garirang re•ruraanirangko champengataha. SWKH a•jani ning•o nosto ong•ako man•gipa biapranga Moheshkola, Gilagora, Ranikor jolni adita biaprang, Ryngku aro Mawshynrut C&RD Block-ni ning•o ga•akgipa Kallu songrang ong•a. Songni manderang janggitangko naljokatna cha•a ringa gri Relief Camp-rango dongenga, uni gimin sorkari duko ga•akenggipa manderangna ta•rake cha•ani, ganna chinani chola ba•ra, samrang, pinne tuani gombol ba blanket, tarpaulin, CGI sheet, ringani chirangko sokatna nangchongmota” ine Sanggra Marak janapataha.