Moheshkola songni manderang cha•a ringa gri buringrangchi kate dongna nangenga
Ranikor, June 20, 2022: South West Khasi Hills a•jani ning•o donggipa Moheshkola songni manderang Robibar salo a•dokni Skotong Minister Conrad Sangma-na lekka sedoatenba, mikka jimbee waani a•sel Moheshkola songgimik neng•nikaniko man•enga ine janapataha.
Songni manderangni janapatani gitade, June 16 tarik walo mikka jimbee waanichi Moheshkola songgimik chi sripako man•an baksana, bajar antio mirongrang aro gipin bosturangko chi man•pakangtokaha.
Indake Moheskhola songko chi sripanichi songni manderang janggitangko jokatna a•brirang buringrangchi katdoangtokaha.
“Chingni janggina ka•oksie dabianiko sorkari knachakchongmotna nanga. Dilgiparang chingna cha•ani ringani, samrang, tarpolin, CGI Sheet-rangko Chopper-rangko watate chingko nama biapchi rimange donena nanga. Ranikor-oni Baghmara-ona tarienggipa NH ramao a•arang rudapani a•sel garirangni re•ruraaniko champengaha. A•a rudapani a•sel sorokrang, culvert-rang aro dollong gimikan nosto ong•ako man•aha.
Moheshkola songgimikko chi sripan baksana chansokpilgija biaprango a•arang rurongaha. Iani a•selo bang•a manderang nok jam gri ong•na nangaha. Chinga Sorkarini dakchakanirangko man•na ka•donge da•o dipetde Relief Camp-rango dongchakenga. Songni manderang darangoba mirong dongjaha, chinga pilakan okgimmu cha•a ringani gri okkria chake dongna nangenga. Sorkari chingni nangnikanirangko knachakna nangchongmota aro ta•raken dakchakanirangko sokatna nanga” ine songni saksa Tushar Banai janapataha.
Apsandaken West Khasi Hills a•jani Khalu songoba mikka jimbee waanichi manderang neng•nikarangko man•tokenga. Sukrobar pringo Khalu songni nok jamran, skul nokrang, community hall, gilja nok, jilla kaanirang gimikko Rongkai chibima dal•bae rang•san man•pakangaha.
Uasan ong•aigija Khalu songni bang•a manderang nokgri jamgri relief campo ma•chake dongenga. Uamang cha•a ringa gri ong•e dongna nangao ga•akaha, uamangni duk mikchirangko sorkari knachongmotna nanga ine Khalu songni Jimmychrist G. Marak u•iatskaha.