Tura, June 20, 2022:Garo Students’ Union, Central Executive Committee (GSU-CEC) aro Post Graduate Students’ Union (PGSU)-ni dabianiko da•onaba be•en pil•ate on•kujaengani gimin, Tura NEHU Campus-ni Vice-Chancellor-na lekka sedoataha.
“Chinga Garo Students Union (GSU) Central Executive Committee (CEC) aro Post Graduate Students Union (PGSU), Students Community-na dabianirangko chu•sokate on•kujani gimin matnangenba Tura NEHU Campus-ni Vice-Chancellor-na lekka sedoataha. Batanggimin salrango chinga tom•anirangko ong•ate, Tura NEHU Tura Campus-ni Pro Vice-Chancellor-ko kamoni a•rikgale gipinko rakkichina dabiaha, indiba chingni dabianirangko knachakgen ine ku•rachakahachim. Indiba da•alona kingkingba dabianirangko chu•sokate on•kuja aro chingna tol•pinikgipa kattarangko agane ka•dongataha. Chingni dabianirangko sal 7-ni gisepo knachake gital Pro Vice-Chancellor-ko rakkina nanga, chu•sokatjagenchimode chinga batanggimin salrango gita apsan jingjengataniko ong•attaigen” ine GSU aro PGSU-ni President parakataha.