SSA skigiparangni chu•gimik dormahako March 11 tarikna skang on•jaode pilak skulrangko chipatgen:AGHSSASTA
Tura, March 6, 2022: All Garo Hills SSA School Teachers’ Association (AGHSSASTA) ru•uta ja-rangna man•kugijagipa dormahani bidingo Sonibar salo tom•e chanrimaniko dakangaha.
SSA skulo skigiparang re•anggipa 2021 bilsini October jaoni ia bilsini February jaona kingking dormaharangko man•kujaengni gimin jinma chanchianiko dakenba re•baenggipa March jani 11 tarikna skang sorkari SSA skigiparangna ja 5-ni dormaharangko bon•ne on•na man•jaode, dormaha man•kuja dipetna skulrangko ka•gija dontongatgen aro sorkarini ge•etgipa kamrangko ka•jawa ine parakataha.
“Chinga salantini nanganina koros ka•na, skul admission, bijolini bill, chini bill aro skul fee-rangko gamna tangka paisa dongjae namen dukko man•a. Chinga ja 5 ba ja 6 dormaha man•gija dongengoba chingna ja 1 ba ja 2-ni dormaharanngko sorkari on•gitchie roaniko nangnikja, chingni dabianirangko knachakjagenchimode, chinga kamtangko ka•angjawa aro skulrangko kulijawa” ine AGHSSASTA-ni President LG Momin u•iataha.
Unbaksana “Chinga AGHSSASTA-ni gita March 3 tariko A•chik Kobor News Channel-o AGHSSASTA-ni President Labingstone G. Momin-ni kosako tol•e matnangenba jinmana parakataniko raken jegala. Chingni March 2 tariko tom•bimonganiona darang media-ba chingni rally ong•atgipa biapona re•baja aro Press Statement-koba ra•eja, indide maidake chingni President-ara badia media-na Press Statement-ko on•atjok ine AGHSSASTA sing•dongaha. President-ni kosako matnange agangipa kattarangara tol•gipasa ong•aia maina ua salo darang media-ba kobor ra•na sokbaja. Chingni President aro chingni ka•rimskarang March 2 tariko darang Media-naba Press Statement on•a dongja aro maming dakeba LOCAL MEDIA-rangko chonnike agana dongja, batesa chinga Garo Hills-ni News Channel-rang aro Media-rang jekai Shillong Times, Highland Post, Kosi Songbad, Salantini Janera, Hub News, Guardian, Meghalaya 24 News, Bangla News 24 aro uandake gipin gipin media-rang baksaba melie nangrime dongenga. Uamang chingni ka•oksie man•na nangenggipa dormaharangko on•china chrike a•boke grapengon uamang chingni ma•ringaniko knae chingni ku•rangko sorkarina aro jinmana sokatna dakchakronga. Chinga Local Media-rangko mol•molna sika mikkangchi chingni bidingo maming sakki gri news channel-rango tol•e jangbingbangatpajachina aro kobor-rangko an•tangni channel-rango, page-rango watpajachina mol•molata. Indake jangmikbranggipa kattarang mandena namgija bimingko ra•baa aro namgijako man•a baksana kracha•e duk ong•aona sokata” ine AGHSSASTA-ni Publicity Secretary Bunbunbirth R. Marak janapataha.
“An•tangko media-ni mande ine saksa mande, Garo Hills-ni SSA skulo skienggiparangni kosako maming sakki gri matnange agananiara kraani ong•ja aro GH-o songdonge SSA skulo skigiparang pilakkon kracha•aona ra•baa. Chinga AGHSSASTA-ni mande indake tol•e jangbingbangataniko aro matnanganiko raken jegala” ineba Bunbunbirth Marak janapatjolaha.