Tura, October 7, 2022: All Garo Hills SSA School Teachers’ Association (AGHSSASTA) Central Body (CB)-ni u•iatani gitade, a•dok sorkari tol•e SSA skigiparangni dormaharangko on•china ge•etaniko on•aha. Indiba skigiparangni man•na nangenggipa tangkarang account-o napjaha ine matnangaha.
AGHSSASTA-ni u•iatani gitade, a•ja ge•antini District Mission Coordinator (DMC)-rangna a•dok sorkarini Secretary aro SSA-ni State Project Director A Ch. Marak tol•gipa salary release order-ko on•ataha. Indake tol•gipa order-o September jani 28 tariko tangka gong 109,73,73,100-ko June jaoni August jaona SSA skulo skigiparangna on•china ge•etaha.
“A•dok sorkari, chingni dormaharangko ku•sikchisan on•aia ong•ode, chingara maikai dormahatangko man•gen. Sorkarini manderang salary release order-ko on•atgenchimoba, tangkako uamangoni account-ona sokatjaha” ineba AGHSSASTA janapataha.
“Chinga SSA skulo skigiparang Hindu, Kristian aro bang•a toromni manderang apsan jinma ku•monge an•tangni kamrangko name ka•enga. Indake ong•enggon sorkari chingko changni chang katta mangmangchi dormaharangko man•gnok ine aganne cha•bokenga. A•dok sorkariara tangka dongjagenchimode, maikai dormaharangko on•china ge•etna man•gen. Chinga iani bidingo a•dok sorkarini talataniko nangnika” ine AGHSSASTA-CB-ni Publicity Secretary Bunbunbirth R.Marak janapataha.
A•dokni Education Minister Lakhmen Rymbui-ni Press Release-o janapani gitade, ma•mong sorkari gong kror 272.46 tangkarangko Meghalaya a•dokna chamataha aro ua tangkarangko SSA skigiparangna on•na nanggnigipa dormaharangko aro arrear-rangko on•gnok ine aganaha.
Ma•mong sorkari chingni man•a nanggni tangkarangko a•dok sorkarina on•ataha ong•ode, a•dok sorkari maini gimin chingna tangkarangko sokatkujaenga. Bano aro maina jakkale chingni man•na nanggni tangkarangko bon•ataha? Chingni sing•anirangna sorkari aganchakaniko on•na nangchongmota ineba SSA skigiparang dabiangaha.