Shillong, June 28, 2019: Sombar salo Cabinet Meetingko ong•ate, sorkarini a•arangko jakkalpitaina chanchiangaha.
Cabinet Meetingo dilgiparang East Garo Hills a•jani Skotong songjinma Williamnagar-ni ning•o donggipa Balsrigittim aro Warimagre gittimni a•arangko sorkarini kamna jakkalanggnok. Balsrigittim aro Warimagre-o donggipa sorkarini a•arango manderang niamni kosako re•e adita bilsirangna nokrangko rike, a•arangko ra•sekdrae dongenga. Batanggimin 2002 ba 2003 bilsirango sorkari, Balsrigittim aro Warimagre gittimni a•arango niam gri nok rike a•kangenggipa manderang baksa agangolpogrike a•arangko sorkarini kamna jakkalangpiltaina tik ka•angaha. Indiba da•alona kingkingba ia chanchianiko ra•gatna man•kuja. Indake gittimo songdongenggipa nokdang geprakni manderang 10,000 sq ft a•arangkosan jakkalangna gita man•aigen aro GHADC-ni dongimin rate gita game dongna nanggen. Warimagre gittimni a•arangna bigha prako gong lak 2.25 aro Balsrigittim-ni a•arangna bigha prako gong lak 1,87,500. Uandake ja prakprakon gittimo songdongenggipa nokdangni manderangba, nokantina dongimin rate gita gamna nanggen. Apsan niamkon Tura songjinmaoba ra•gatanggen ine u•iataha.
Cabinet, MeECL Department-ni Board membor-rangkoba bodolangna chanchiangaha. Indake MeECL Department-ni Full Time Managing Director (MD)-ko IAS cadre/ Lateral Entry/ Technocrat-rangni giseponiko seokanggen. MeECL Department-ni MD-an MePGCL, MePDCL aro MePTCL subsidiaries-ni Managing Director (MD) ong•e kamko ka•anggen. MeECL Department-ni Non-executive Chairman-an Power Minister ong•angskagen aro Subsidiaries ge•gittamni Chairman-an Chief Secretary/ Additional Chief Secretary/ Principal Secretary/ Power Incharge ong•angskagen.
Cabinet, Meghalaya Minor Mineral Concession Rules 2016-koba dingtangatna chanchiangaha. Batanggimin salrango chibimarangoniko an•cheng bikotna, gita dingtang dingtang Department-ni manderang raiko on•jachim. Sorkari iani bidingo chanchirimaniko dakenba chibimaoniko a•a bikotna sikgipa manderangna amendmento pangchake niamrangko see jote talate on•ne lease agreement-ko tarie raiko on•anggen ineba u•iataha.
Sombar salo Cabinet Meetingo dilgiparang Meghalaya Protection of Interest of Depositors Rules 2022-koba ra•gatangaha. Cabinet Meghalaya Police Service Rules 1996, jeon MPS-rangni niamo Schedule 1-o janapgimin gita, Senior Duty Post-ni nombor-rangko sak 21 oni 24 ona baridapatchina aro Junior Duty Posto sak 75-oni 102-ona baridapatna nanga jedakode uamang Senior Scale-o bilsi 8-na aro Junior Scale-o bilsi 7 kamko ka•e, uamangni kamrango promotion-rangko man•nanggen ine u•iataha.