Shillong, Nov 6, 2022: Meghalaya a•dokni kona noksik gimiko TMC dolko bilakatna songdongenggipa manderang baksa ku•monge a•doko namroro silroroaniko ra•bana man•na gita block meetingko ong•atangaha.
Indake Sonibar salo Block Committee meetingko East Khasi Hills a•jani Sohra elakkao ong•atangaha. Ia tom•aniko ong•atanio Meghalaya a•dokni TMC President Charles Pyngrope, Umroi-ni TMC MLA George B. Lyngdoh, Meghalaya TMC-ni dilgipa James Lyngdoh aro gipin dilgiparang dongpae bakko ra•angaha.
Meghalaya TMC President Charles Pyngrope tom•anio jinmana aganprakengon, “Chinga re•baenggipa 2023 bilsini eleksino chena gita ka•donga. Sohra-ni manderang dingtanganiko nangnikenga. TMC manderangni namgnina mikkangchi raken kamrangko ka•anggen” ine aganangaha.
Umroi-ni TMC MLA George B. Lyngdoh, kam gri dongenggipa chadamberangna a•dok sorkari simsakja aro janggi tangani cholko on•na man•gijagipa sorkari ong•a ine jinmana aganangaha. “Manderangni ku•monge kam ka•na nanggniara, minggni chol gnang, mingsara da•o sason ka•enggipa sorkari jean a•doko kangal cha•asianiko (corrupted) ra•bagipa MDA sorkari, minggipinara TCM jean a•dokni manderangna namgniko ra•banagipa dol ong•a. Na•simang badia dolna chakpaaniko on•gen aro badia dolni candidate-ko seokgen. Meghalaya TMC miksonganirangko on•na ka•donga, kakketo kamko ka•na re•mikkanga aro chadamberangna namgipa cholrangko on•na miksongani, kratcha•gijagipa NPP-chi dilenggipa MDA sorkaro ka•dongna man•sranggija” ine Lyngdoh aganangaha.
Meghalaya a•doko dingtanganiko ra•bana chanchimanaha ine TMC dilgipa Harold Khongsit, aganengon, “Anga Congress dolko watani ja•mano, anga TMC-ko baseaha, maina anga a•doko dingtanganiko nikna sika, TMC-na darang dolba dingtanganiko ra•bana man•jawa. Sohra elakkao maming development-rang dongsrangja ine sakkiko on•enga. Mongsongbate bi•sarangna poraiani skul aro kolej-rang chu•onggijaniko nikna man•a. Una agreba jensalo kam gri dongenggipa chadamberang wa•al gita ching•doe chakataha, sorkari mamingkoba dakna man•ja aro chadamberangni neng•nikaniko ma•sichakja aro chadamberangna cholko on•na man•ja, iarang gimikan sorkarini daito ong•a” ine Khongsit aganangskaha.