Mother App-ko jakkalanichi an•o kegipa ma•giparang siani komiata

0

Shillong, Nov 6, 2022: Meghalaya Sorkari re•anggipa 2019 bilsio a•dok gimiko an•o kegipa ma•giparangni an•seng-baljokaniko name rakkina aro jajrengani gri bi•sako atchiatna man•a gita mingsa namgipa cholko bikotaha.

Ia Mother App-ara an•o kegipa ma•giparangni bidingo sandie chimongani mingsa Application ong•a, jeko a•bachengataonin a•dokni sanchakram biaprango bi•sa atchiataniko bang•bate nikna man•aha aro atchiani somoio ma•gipa siani, chong•motan Maternal Mortality Rate (MMR) komiaha.

Indake ia App-ko jakkalanichi ANM-rang songrangona re•ange am•sandianiko dakenba uamangko application-o gapate uko district aro state level-ni doctor-rang aro health official-rangona sokata, indake Mother App-o gapatgiminrangko nie an•o kegipa ma•giparangni bidingo u•i-ma•sina gita man•a.

“Ia App-ko jakkalna skangde, an•o kegipa ma•giparangni an•seng-baljokaniko nirokna gita man•jachim, maina somoi gita uamangni bidingo am•sandianirangko dakna man•jachim aro basakoba chimonggimin data-rangko lekkarango ba register-rangosa see rakkiani gimin uarangko name dakna gita man•jachim,” ine Directorate of Health and Family Welfare Government of Meghalaya-ni Additional Secretary Ramkumar parakataha.

Indake ia Mother App-ko South West Garo Hills a•jao jakkalna a•bachengataha aro jadokni gisepon, sanchakram biaprango bi•sa man•ani 44% oni 76% ona bariaha. Uni ja•mano a•dok gimiko a•bachengataha ineba u•iataha.

Ia Mother App-ko an•tangtangni mobile phone-ko jakkale, ANM-rang an•o kegiparangni bidingo nangchongmotgiparangko am•sandie gapatenba uamangni kengnirang donggenchimode, bi•sa man•aniko chanchichipsogimin salrango tikka su•ani tariko, be•enko porikka ra•e nianio dongram biap aro contact information-ko see rakkianggen.

Ia apsan am•sandianiko App-ni Dashboard-oniko man•gen aro iarangko medical officer-rang, frontline health worker-rang nie, kengnio ga•akenggipa ma•giparangko sandie simsakatna gita man•a.

Bhoirymbong CHC-ni Medical Officer, Dr. Tyngshain Sutnga, Mother App-ni Dashboard-ko salo baditaba chang nia. Iako dakani ja•mano, ua an•tangni kam ka•gipa biapni ning•o donggipa kengnio ga•akenggipa ma•giparangko sandie uamangni be•enko porikka ra•e niani somoirangko gisik ra•ataniko on•a aro bi•sa man•ani somoiona tarisoa.

“Adita salrangna skang, Mother App-ko jakkalanichi sanchakram biapo bi•sa atchina gonggijagipa kengnio ong•enggipa an•o kegipa ma•giparangni janggiko jokataha” ineba parakataha.

ANM-ni App-o gapatani ja•mano ia case-ko kengnio ga•akenga ine mesoka. Bi•sa atchianiko chanchichipsogimin, salna salgittam skang ma•gipako kobor ra•e ASHA worker-ko grongna watata. Ua ma•gipa manchisogimin salna salsa ja•man bi•sa man•ahaoba ua somoio Placenta ba okningoni moilarang joke katjaha. Rasong gnangbee, ia ma•gipani nokdangni manderang uamangko grongegipa ASHA worker-na kobor on•atna gita man•aha. Indake CHC-o kam ka•giparang koborko man•e, doctor uni dongenggipa biapona ambulance-ko watataha aro ua ma•gipako somoi gita hospital-ona rimbana man•anichi uko jokatna man•aha ine parakataha.

Ia app-ko jakkalanichi ma•giparangko jokatna man•aniko mesokna man•a ine ian mingsa sakki ong•a, ine Dr. Sutnga aganaha.

Mother App-o chimonggimin data-rangko jinmaba www.meghealth.in oniko nina gita man•gen. Ia data an•o kegipa ma•giparangni an•seng-baljokaniko nirok-simsakna gita dakchaka aro uandake bi•sa atchiani somoio ma•giparangni sianiko komiata.

Meghalaya a•dokna ia Mother App namen dakchakgipa ong•a. Iako jakkale, sorkari bang•a niamrangko tarina gita man•aha aro Chief Minister Safe Motherhood Schemek-oba a•bachengatna man•aha, jekon bi•sa man•ani somoio ma•giparangni sianiko komiatna gita nanga. Da•o dipet, ia app-o chimonggimin data Meghalaya Sorkariko Meghalaya-ni me•chikrangko bilakatna kam ka•anichi an•seng-baljokanina kam ka•aniko dingtangatna gita man•enga ine parakataha.

Leave A Reply

Your email address will not be published.