Tura, December 17, 2022: A•dokni Skotong Minister Pa Conrad Sangma manderangni nisengsoe dongenggipa PA Sangma Sports Complex, Football Stadium-ko Sukrobar salo oprake on•angaha.
“Ia Stadium-ko oprakna gita a•dok Sorkari name chanchichengesa kamrangko ka•aha, jedakode manderang ia salko gisik ra•kamgen.
PA Sangma Stadium, ian a•doko dal•batsranggipa pre-engineered composite football stadium ong•a. Ia Stadium-o sak 9,500 manderangna asongchakani biaprang donga. Ia Stadium-ko rikaniara Sports Complex-ko rikani bak gita ong•a, jekon bang•gija somoirangni gisepon matchote on•anggen. PA Sangma Stadium-ko matchote rikna gita tangka gong kror 127.7-ko jakkalaha.
Football Stadium aro Indoor Stadium ge•gni apsan biapo chu•gimik 17,0000 sq miter mang ong•a aro ia apsan biapon rikengaha. Indoor Stadium-ni ning•o Gymnasium, Swimming Pool, Table Tennis Hall, Squash Hall aro Badminton Hall-rang gnang, jekon 2023 bilsio oprake on•gen” ine Skotong Minister Conrad Sangma aganangaha.
“A•dok sorkari Talent Identification Program-rangko athlete-rangna a•bachengataha. Ia program-rangko ong•ate, a•dok sorkari pilak athlete-rangko sandie uamangna dakchakaniko on•anggen. Program-ni skanggipa phase-o bilsi 10-oni 18-ona ong•gipa bi•sarangni atheletic abilities-ko international standard-o test ka•angaha. Ia test-ko dakanio sak 4,600 bi•sarang seokako man•aha. South West Garo Hills a•jani bilsi 17 ong•gipa saksa Te Raksan Sangma, 20 miter sprint-o international benchmark 2.99 second-na komibate 2.84 second-o man•angaha.
Sports Achiever-rangna Cash Award Scheme-ko bikotaha, jenan kror 3 lak 14 tangkarangko sak 3000 athlete-rangna sualaha.
Ia Stadium-ko oprake on•ani salo, PA Sangma-ko mande ra•an baksa tarigimin uni bimango pindape donggipa ba•rako Skotong Minister badalate on•angjolaha.
Indake PA Sangma Sports Complex, Football Stadium-ko oprake on•ani attamo North East United FC baksa Meghalaya State Football Team kal•susae, uamangni changa sapaniko mesokangaha. Uni ja•mano manderangko an•soatna aro kusi ong•atna gita bang•a Artist-rangko okamate namnamgipa gitrangko ring•e mesokangaha. Indake bon•kamao Drone Show-ko ong•ate, bomarangko so•e manderangko an•saoatangaha.