Nongpoh, December 3, 2022: A•dokni Skotong Minister Pa Conrad Sangma, Nongpoh Pahamsyiem songo General Nursing and Midwifery Skulko Sukrobar salo oprake on•angaha.
Nongpoh elakkani MLA Mayralborn Syiem ia tom•anio bakko ra•angaha.
Skotong Minister Conrad Sangma jinmana aganprakengon, “Chinga NPP sorkari Health Sector-ko nambatatna rakbee kamrangko ka•enga. Batanggimin bilsi 2-ni gisepo an•chingni a•song gimiko Covid sabisini a•sel bang•a neng•nikanirangko man•aha. Uni gimin mikkangchi apsan dakgipa obostarangko chagrongjana gita, a•dokni Health Infrastructure-ko namdapatna nanga. India a•song gimiko, Health Sector-o Tangka jakkalbatsranggiparangoni brigipa ong•a. Chinga bang•a CHC, PHC aro Sub-Centre-rangko taridape on•aha, unbaksana bang•a songrangon sanna bananirangko dakna gita Healtcare Facilities-rangko sokataha” ine aganangaha.
Meghalaya a•doko mande jelbraka ong•ja, indiba a•dokni kona noksik pilakchin songdong a•chagipa manderang gnang. A•dokni dam 6500 songni manderang Skul, Sub-Centre aro uandakgipa dakchakanirangko sorkario dabienga ineba ua agandapangaha.