Skotong Minister FOCUS aro FOCUS+ ni gita tangka paisarangko suale on•anga 

0

Tura, December 5, 2022: Meghalaya Sorkari songadamrango namroro silroroaniko ra•bana krenge kam ka•anirangko dakengon, Sombar salo Skotong Minister Conrad K Sangma, West Garo Hills a•jani Jengjal-o FOCUS+ Program-ni gita tangkarangko sualangaha. Ian Meghalaya a•doko game cha•giparangna dal•batgipa dakchakani ong•a, jekon game cha•giparangni janggi tanganiko tang•doatna aro pangkamgipa janggi tangani cholrangko on•na mikaongani ong•a.

Skotong Miniater tangka gong kror 30-ko ge 60,000 producer group-rangna FOCUS+ni ning•o sualataha. Ia FOCUS+ ni kamko Meghalaya-ni pilak game cha•gipa nokdangrangna dakchakna gita a•bachengataha. Ian Meghalaya a•dokni dal•batgipa, farmers’ welfare program FOCUS aro (Farmers’ Collectivization for Upscaling Production and Marketing System)-ko apalbatatani ong•a. Ia minggni Scheme-rang (Focus aro Focus+) Meghalaya a•dokni game cha•gipa nokdangrangna tangka gong 10,000-ko nokdangprakna on•ne dakchakangaha.

Ian Meghalaya a•doko gisik ra•na krabegipa kam ong•a, “Game cha•giparangni name janggi tanganiko ra•baniara chasongna a•dok sorkarini ka•na nangchongmotgipa kam ong•a. Bang•a game cha•giparangan FOCUS Scheme-ni gita namgnirangko man•ahani gimin anga kusi ong•a. Chinga iandakgipa dingtangmancha kamrangko a•bachengate kangal cholgri nokdangrangna dakchakanirangko on•angkugen. Chingni jumang niksamsoanide FOCUS aro FOCUS+ko bilsirikkit dakanian ong•a. Chinga tangka gong kror 450-ko bilsiantian cholgri-apgri ong•gipa manderangna suale on•ahaode aro uko bilsiantin dakode, bilsi 10-o tangka gong kror 4500-ko sorkarini jakkalanina on•na man•gnok, unode an•chingni game cha•giparang baditan tangka man•genchim, chanchiate nina gita man•gen. Da•alo chinga gong kror 30 tangkarangko ge 60000 game cha•gipa nokdangrangna sualangaha. Chingni kam ka•na miksonganide lak 4.5 game cha•gipa nokdangrangna dakchakani ong•a” ine Skotong Minister aganangaha.

Una agreba, Rongram block-ni ning•o donggipa ge 11 VPIC-rangna tangka gong kror 1.48-ko aro Meglife Project-ni ning•o Community Hall-ko rikna ge 9 SHG-rangna tangka gong lak 11-ko on•angaha.

Indake apsan salon Rural Backyard Piggery Scheme, ‘PROGRESS’-ni ning•o, mang 2000 wak bi•sarangko (bima mang-3 aro bipa mang-1)-ko nokdang ge 500 game cha•giparangna sualangaha. Ia ‘PROGRESS’ Scheme, dingtang dingtang jilla-kaanirangko dake game cha•giparangna pangkamgipa janggi tangani cholko on•na gita miksongani ong•a. Ia Scheme-ni gita sak 10,000 cholgri-apgrigipa game cha•gipa nokdangrangna dakchakaniko on•na krengenga. Una agreba, a•doko wak aro do•o be•enrangko bariatna jotton ka•enga. Ia miksonganio Kuroiler do•orangni high yielding variety-ko sak 100 manderangna suale on•angjolaha.

Meghalaya Farmer’s Day-ni salo Skotong Minister game cha•giparangna, uni nama skaniko on•na baksana uamangna je tangkarangko sualatahachim, uarangara srogipa ong•ja, indiba uamangna suale on•anisa ong•a ine gisik ra•attaianiko on•angaha.

Leave A Reply

Your email address will not be published.