Resubelpara, Jan 10,2023: A•dokni Skotong Minister Pa Conrad K.Sangma Monggolbar salo pagipasagi PA Sangma-ni niksamsoe donanggipa North Garo Hills a•jani A•dokgre-o donggipa Chenanggre Stadium-ko oprake on•na man•ahani gimin kusi ong•aniko parakataha.
Chenanggre-ara PA Sangma-ni miksonge biming donanganiara, A•dokgre-ara cheani a•ja ong•a, da•alo ian A•sokgre-ni manderangna cheani sal ong•a ine Conrad Sangma jinmana aganprakangaha.
Ia Chenanggre Stadium-ko phase ge•gni dake rikaha, jeon akanggipa phase-o Ministry of Tribal Affairs tangka paisarangko on•ataha aro gnigipa phase-o ma•mong sorkari aro a•dok State Scheme-ni tangka.paisarangko dakchakaha.
“Chinga ia project-ko chu•sokatahani gimin ka•donga, a•dokni chadamberang janggi tanganio kal•susaaniko tang•doatna man•gen” ine Pa Sangma agandapangaha.