Resubelpara, January 10, 2022:Rongrong elakkani MDC Rinaldo K. Sangma, a•dokni Skotong Minister Pa Conrad Sangma-ni kamrangko jegale matnangataha.
“Skotong Minister Conrad Sangma manderangni namgnina kamko ka•enga ine mesokna miter 100 mangmang ramao black topping on•ate, jachipchang de•e manderangko cha•bokenga.Damra, Resubelpara aro Bajengdoba ramako tarina gita 2019 bilsion project-ko on•manaha. Indiba ia ramako da•ona kingkingba matchote tarikujaenga. Bang•a changon NGO-rang, bading chiwale janggi tanggiparang ia ramani bidingo badi ka•aha, indiba darangan ia ramako matchote tarina gisiko nangja. Ia ramako a•jani manderang salantian re•ruraenga. Uni gimin Conrad Sangma ta•rake matchotatgnok ine jachipchang de•enba tol•e social media-o post ka•genchimoba, chinga kamrangko mikrontangchi nike bebe ra•na man•jaha.
Social Media-o ramarangko tariengaha aro black topping on•engaha ine mesokatgipa Gajing Bibra ramako Conrad Sangma-ni re•bana skang mangmangsa rama paksako black topping on•soaha” ine Rinaldo K.Sangma parakataha.
Resubelpara, Gajing aro Mendipathar ramako a•jani manderang salantian re•rurae janggi tangenga. Ia ramani obostarang namsrangjagenchimoba, a•jani manderang gipin ramarangko re•na maming chol dongja. Uni gimin Conrad Sangma Contractor-rangko ta•rake ia ramako matchotatchina didiatna nanga ineba ua agandapataha.