Simsang chibimao aro Aginma wario gimagipa chadambe sakgnini manggisiko man•pila
Tura, April 20, 2022:Re•anggipa Sombar salo piknik cha•na re•ange Rongkem piknik cha•ram Simsang Chibimao gimagipa Gondenggre songni bilsi 16 ong•gipa pante Dring Salgrik @ Niksrap T.Sangma-ni manggisiko Budbar pringni 8 bajimango Simsang Chibimaoniko man•pilaha ine kobor man•aha.
East Garo Hills a•jani pulisrang, rescue dolrang aro songni chi jrona changgipa manderang, Rongkem piknik cha•ram biap Simsang chibimao gimachenga salonin sandiahachim, indiba salgittam ja•mansa ua panteni manggisiko Budbar pringo man•aha ine EGH a•jani pulisrang parakataha.
Indake ua manggisiko porikka ra•e nina gita Williamnagar Civil Hospital-ona watataha ineba u•iataha.Ua manggisiko sandianio pulisrangna dakchakgipa songni manderangko East Garo Hills a•jani pulisrang mittelataha.
Niksrap T.Sangma Tura Kramcheng Socio Cultural Club (KSCC)-ni membor ong•e, milam sepi ra•e grikaniko dakrongachim, ua rasong gribee rang•gitik a•selo ga•ake an•tangni gamchatgipa janggiko gimaataha. Uni a•gilsakko wate re•anganina Kramcheng Socio Cultural Club-ni ka•rimskarang club-na aro nokdangni manderangna dal•bea gimaani ong•aha ine KSCC-ni membor-rang duk ong•aniko parakataha.
Unbaksana a•dokni Skotong Minister Conrad K. Sangma aro Health Minister James Pangsang K. Sangma, duko ga•akgipa nokdangni manderangna aro ma•drang maharirangna duk ong•e kalimpaaniko kattako parakataha.
Indake ong•engon, manderang indakgipa a•sel ong•aoni an•tangtangko naljoke rakkina sakantian chibimarango aro chibima rikamrango skatang rogija simsake rochina manderangko EGH a•jani pulis didiataha.
Apsan salo South Garo Hills a•jani Emangre Aginma Fish Santuary wario gimagipa Eringgre songni bilsi 18 ong•gipa Jhon Clister Marak-ni manggisikoba mijal Monggolbar pringni 10:45 bajio South Garo Hills a•jani pulisrang aro songni manderang man•pilaha ine parakataha.