Baghmara, June 9, 2022: South Garo Hills a•jani me•asa saksako Jadi Pulis Outpost o badi ka•anga ine koborna parakataha.
Badi ka•gipa lekkao janapani gitade, segipa ra•e nokdang dakgimin bi•sa sakbrini ma•gipa Sama M Sangma, re•anggipa June 5 tariko Franchis (Barud) Tamang-ni kosako drae til•ekna am•anina Jadi Pulis Outpost-o badi ka•aha.
Sama Sangma-ni paraka gitade, Franchis ba Barud Tamang June 3 tariko walni 11:30 bajimango Sama M Sangma-ni nokona nape drae til•ekna jotton ka•aha. Indake an•tangko obostaoni jokatna warachakmiting somoio segipa sokbachanggenba uko jokatna gita man•aha. Obostako chagronggipa Sama-ni segipa Fulban Hussain ong•achim. Dos dakgipa Tamang-ko changni changna nokdangni manderang uni namgijagipa miksonganiko u•ie ka•mikkenate sason ka•e donachim, indiba manigija nape ong•gija dakna jotton ka•aha ine uni badi ka•gipa lekkao janapaha.
Franchis (Barud) Tamang uni ripengrang baksa Jadi bajaro nok para ra•e dongengachim. Indake ia obostani bidingo nok nokgipa chong•motan Marak Maharirang Fulban Hussain aro uni jikgipa Sama Sangma-ni kosako Tamang-ko kragija an•chi pari nikpile dokahani gimin badi ka•angskaha.
Maina Fulban aro Sama jiksesa Franchis (Barud) Tamang-ko kragija sko bretpile dokahani gimin, namen saknaako man•aha aro salgnina kingking mikselgija rang•sitesan dongengani gimin, Marak Maharirang bakan uko Guwahati hospitalo sanna gita ra•angaha. Uni janggi mai ong•gen, tanggenma sigen u•ina man•kujaenga ine koborna u•iataha.