Baghmara, July 6, 2022: South Garo Hills, a•jani nangrimgimin NGO-rang jekai GSU, FKJGP aro ADE Monggolbar salo Sibbari Primary Health Centre (PHC)-ona re•ange dokdorko grongenba manderangni neng•nikenggipa obostani gimin chanchiangaha.
NGO-rangni janapata gitade, Sibbarini manderang aro uni wilwilao songdongenggipa manderang hospitalo bang•a neng•nikanirangko chagrongenga. Maina Sibbari PHC-o kam ka•giparang aro office-rang chu•ongjani a•sel manderang namen neng•nikaniko man•enga.
Uni gimin NGO-rang Gasuapara-o gital PHC-ko on•china dabiangaha. NGO-rangni nikanio Sibbari PHC South Garo Hills-ni bang•a songni manderangko nirok simsakna agrepile arearang dal•ani gimin amsokja aro name kam ka•na man•ja. Maina Ruga aro Gasuapara jolni manderang Sibbari PHC-ona re•bae sanna bananirangko dakna namen chel•ani gimin ramarang namjae neng•nikaniko man•a.
Unbaksana Sibbari PHC-o sanchakram biaprang aro kam ka•chakram nokrangba chu•ongja, una agreba chel•bea biapni manderang birth certificate tarina non-availability form-rangko man•rongja, iandakgipa obostarangko Sibbari PHC-o chagronge neng•nikaniko man•enga ineba NGO-rang janapataha.
Uni gimin NGO-rang chanchianiko dake Sibbari PHC-ona re•angenba, manderangni neng•nikaniko janape Gasuapara-o gital PHC-ko a•bachengate on•china dabianio chakpachina dokdor-ko mol•molangaha.
Indake NGO-rang ia dabianiko ta•rake chu•sokatpachina a•dok sorkariko mol•molataha.