NGO-rang Sibbari PHC-o asonge jingjengata 

0

Baghmara, July 6, 2022: Sibbari PHC-o bang•a neng•nikanirangko chagrongengani gimin South Garo Hills-ni NGO-rang GSU, FKJGP aro ADE, Budbar salo asonge jingjengatangaha.

GSU Southern Zone-ni General Secretary Sengrak Sangma-ni u•iata gitade, NGO dilgiparang Budbar salo Sibbari PHC-ni dokdorko gronge, uni jak a•dokni Health and Family Welfare, Minister-na lekka sedoataha.

NGO-rangni jingjengatani miksongara Sibbari PHC-o chu•onga sanna bananiko aro pilak namgnirangko manderangna on•na man•jaengani a•sel Sibbari PHC-ni ning•o ga•akgipa bang•a jolni manderang namen neng•nikanirangko chagrongengani gimin, uamangni mongsonggipa neng•nikanilrangko sul sul see parakatenba dabiangaha.

Skanggipa, Birth Certificate form-rangko Sibbari PHC-o somoi gita je somoioba man•na nanga.

Gnigipa, chu•onga gita hospital nokrangko rike on•na nanga.

Gittamgipa, staff quarter chu•ongjani gimin chu•onga gita staff quarter-rangko rike on•na nanga.

Brigipao, hospital-ni paikanarangko tarudape on•na nanga.

Bongagipa, Sibbari PHC-o ambulance gari ge•sako on•na nanga.

Dokgipa, Sibbari PHC-o chu•onga gita kam ka•giparangko rakkina nanga.

Snigipa, Medical Officer saksako appoint ka•na nanga.

Chetgipa, hospitalko rongtale rakkina Sweeper saksako appoint ka•na nanga.

Skugipa, Gasuapara-o gital PHC-ko on•china dabiangaha. Ia dabianirangko chu•sokatchina Health and Family Welfare-ni Minister-na lekka sedoataha.

Ia Sibbari PHC-o chagrongenggipa neng•nikanirangko ta•rake nirokatchina NGO-rang a•dok sorkariko mol•molataha.

Uni gisepon ia dabianirangko knachakja ong•ode, mikkangchi rakbata ja•kurangko de•e jingjengatanirangko dakanggen ine NGO-rang parakataha.

Leave A Reply

Your email address will not be published.