Tura, June 28, 2022: Re•anggipa June 26 tariko A•konggre Sepoy Colony gittimo adita so•sojengjeng ong•ani bidingo tom•tomaniko ra•bapilna gita Sombar salo tom•e chanchirimaniko dakangaha.
Ia tom•aniko West Garo Hills a•jani Pulis Department, rang•gitik tom•aniko ong•ate, A•konggre Sepoy Colony gittimo songdongenggipa manderang, Mondolini dilgiparang aro A•konggre Nokma Rakkan Sangma-ko okgamate, Sepoy Colony gittimo tom•tomaniko ra•bana gita chanchirimaniko ong•atangaha.
Gittimni manderang, jat aro torom basegija apsan meli nangrime dongna nanga. Gittimo ba songsalo ku•mong nangrimani dongjaode, maming saloba namroro silrorona gita man•jawa, uni gimin sakantian pulisrangni kam ka•anio bakrimpachina Tura Pulis Station-ni Circle Inspector (CI) B.N.Marak sakantiko didiangaha.
Unbaksana, bang•a gittimni manderang aro toromni dilgiparang, batanggipa salrango je kajia golmal ong•genchimoba, uarangko guale ba kema ka•grike mikkangchi iandakgipa obostarang ong•jachina, jatsa jatgipin baksa ka•sagrikao ku•mong nangrime dongchina gittimni manderangko didiangaha. Indake gittimo tom•tomaniko ra•bapilna, Peace Keeping Committee (PKC)-ko songgen ineba parakangjolaha.