Bajengdoba, June 28, 2022: Bajengdoba jolni NGO-rang aro songni manderang June 27 tarik Sombar attamo re•anggipa April 20 tariko ka•saninggija so•otako man•ne sianggipa, Neha Momin-na duk ong•e kalimaniko mesokna, bang•a manderang mombattirangko so•e uni janggina bi•chakaniko dakangaha.
Unbaksana, dukko man•enggipa nokdangni manderang bang•a ka•dimeanirang sokbapilchina bi•chakaniko dakangjolaha.
Neha Momin-ko uni mikchatang Solesh Marak, tol•e okgamatenba so•otani ja•mano srik srik Neha Momin-ni manggisiko Sona Chiring buring an•chengo gope galahachim. Indake uni manggisiko West Garo Hills, a•jani pulisrang June 25 tariko bilpilaha. Indake niam gita Tura Civil Hispitalo post mortem ka•a motchatani ja•mano nokdangni manderang songtang Bajengdoba-ona ra•ange June 26 tariko gope galaha.