SDSEO-ko rang•gitik kam ra•jitanganina GSU jegala, transfer order-ko ra•galpilchina mol•mola

Tura, March 10, 2022: Garo Students’ Union (GSU) Western Zone (North) Dadenggre, niam gri rang•gitik Sub Division School Education Officer (SDSEO) Ma BK Marak-ko kam ra•jitangani gimin raken jegalataha.
GSU President Tengsan M.Marak-ni u•iatani gitade, Ma B K Marak kamoni neng•takako man•na sal 22-san dongaiahachim, uni gisepon sorkari rang•gitik transfer ka•ataha.
Ma Marak saksa gisiko nange jolni manderangna kamrangko dangdike on•gipa officer ong•achim, uandakgipa sorkarini kamna GSU Dadenggre suk ong•gijaniko parakataha.
Ua saksa office-ko name re•dilgipa aro jatna kakketo kam ka•gipa officer, retire ong•na sal 22 san dongaiahachim, uko kal•ake kam ra•jitanganiara sorkarini dal•a gualani ong•a aro niamni a•palo ga•aka ine GSU parakataha.
Je officer-an da•o uni palo kamko ka•ekuja uko rang•san disbursement order-o pangchake order on•ara ong•ama ine GSU sing•doangaha.

Sorkarini ning•o kam ka•giparang jemangan retire ong•na ja 6 ong•ahaon uko maming dakeba transfer ka•na gita man•ja. Indiba sorkari mai miksonganio A•chik Officer-ko kal•steke jatko ong•siatenga. Indakgipa sorkarini kamko GSU Western Zone (North) Dadenggre raken jegala aro transfer order-ko ta•rake ra•galpilchina mol•molataha.
“Chingni mol•molako knachakjaode, dingtang dingtang ja•kurangko de•e jingjengataniko a•bachengatanggen” ine GSU President Tengsan Marak parakataha.