Save B-Mahal Committee jinmani tom•aniko ong•atanggen

0

Tura, August 7, 2022: West Garo Hills a•jani Raksamgre aro Pedaldoba jolrango songdongenggipa manderang Save B-Mahal Committee, B-Mahal-ko pale cha•ani bidingo jinma tom•bimonganiko ong•atangna tik ka•aha.

GHADC-ko rikenggipa Executive Committee-ni membor-rang B-Mahal-ni a•arangko songni manderangna maming u•iata gri pale cha•aha ine parakataha. Indake uamangni sruk sruk kam ka•aniko jegalna gita August 13 tariko Pedaldoba Secondary Skulni kal•chakramo tom•aniko ong•atanggen ine Save B-Mahal Committee-ni Chairman Rimjen Ch Sangma u•iataha.

Save B-Mahal-ni u•iatani gitade, North Garo Hills aro West Garo Hills a•jani ning•o ga•akgipa B-Mahal-ni a•arang hecter 5000 mang donga, ia a•arangko GHADC-ni Executive Committee-ni membor-rang songni manderangna maming u•iata gri Meghalaya Tourism Development Corporation (MTDC) aro Meghalaya Industrial Development Corporation (MIDC) Department-na kror 58 tangkarangko skang ra•chaksoahachim.

Indake 2022 bilsini May 20 tariko Mahal a•ani bidingo tom•aniko ong•atanio a•dokni Skotong Minister Conrad Sangma, MDC Rakesh Sangma, GHADC-ni CEM Albiniush R Marak, DCA-ni Commissioner aro Secretary Synrem, Finance department-ni Commissioner aro Secretary Dr. Vijay Kumar bakko raangaha.

“Chinga GHADC-ni kamko raken jegala, uamang an•tangni namgnina six schedule-ni ning•o ga•akgipa a•arangko pale cha•na niam dongja” ine Rimjen Sangma parakataha.

Batanggimin 1952 bilsio Zamnidari System-ko gimaatani ja•man, Bijini Rani ia a•arangko jinmana pakwate on•angaha. Indake District Council-ni dilgiparang Bijini Rani-na tangka gong lak 13-ko on•ne B-Mahal-ko breaha ine aganchakanira kakket ong•ja.

“B-Mahal-ni a•arangko GHADC, Bijini Rani-oniko brea ong•ode uamangni soi ka•gimin agreement-ko jinmana mesokchengna nanggen. GHADC-de a•arangko nirokgipasan ong•aia uamang a•ani nokgipa ong•ja” ine Rimjen Sangma jegalataha.

Leave A Reply

Your email address will not be published.