Baghmara, Sept 30, 2022: South Garo Hills a•jao donggipa Rongsu Agal songni manderang, jemangan Chitmang (Waimong) a•brini ja•reko songdongengachim, ua manderangni salantio re•ruraenggipa rama namarangjani gimin, re•anggipa 2018 bilsio Pa Rakkam A.Sangma jean da•o Rongara-Siju elakkani MLA ong•engachim, ua songona re•ange eleksin campaign ka•ani somoio, “Anga MLA ong•ode, ia ramako tarie on•gen” ine ku•rachakahachim.
Indiba da•o bilsi 5 ong•piloba Rongsu ramako tarie on•chipja ine songni manderang suk ong•gijaniko parakataha.
Pa Rakkam Sangma an•tangni ku•rachakgimin Rongsu ramako tarie on•chipjani gimin, Rongara-Siju elakkani gitcham MLA Pa Rophul S.Marak, Rongsu songo songdongenggipa manderangni neng•nikbee janggi tanganiko ma•sichake, JCV bolgniko watate ua ramako tariatengaha ine songni manderang parakataha.
Rophul Marak, manderangni namgnina Rongsu ramako tariatengani gimin, songni manderang Rophul Marak-ni kamna kusi ong•aniko parakataha.