Baghmara, November 15, 2022: Rongara Siju-ni MLA Rakkam Ampang Sangma-ni election-na wenmitting somoio Rongsu ramako tarie on•gen ine ku•rachakenba bilsi 4 ja 6 batangpiloba tarigija galchpe donenggipa Siju-oni Rongsu-ona re•anggipa ramako Rongara Siju-ni MLA gitcham Rophul S.Marak JCB ra•ange tariatengaha ine u•iataha.
Ia rama namsrangjani gimin Rongsu-ni manderang bajar anti re•anio namen neng•nikaniko man•engachim. Skangonin ia ramako darang MLA-ba tarie on•a dongjachim. Indiba Pa Lotsing A•gitok Sangma sagini MLA ong•mittingo Simsang Chibimako hanging bridge ba kadingdegipa dollongko kae donangaha. Ia hanging bridge gita Simsang chibimako ga•bate, Rongsu-ni manderang namgijagipa a•brini ramako motor bike-rango bosturangko salruraenga.
Indakgipa neng•nikaniko nike Rophul Marak JCB ra•ange, motorable ramako cho•atengaha ine songni manderang u•iataha aro Rophul Marak-ni namgipa kamna songni manderang mittelpilani kattarangko parakataha.
Rongsu-ni manderang gipin rama dongjae, wachi a•rak apsan ramakon re•rurae namen neng•nikaniko man•tokengachim. Batanggimin somoirango bang•a candidate-rangan election-na campaign ka•mittingo, ia ramako tarie on•gen ine ku•chakronga, indiba jensalo MLA man•ani ja•manode, gualtokaia darangba tarie on•a dongja ine songni manderang suk ong•gijaniko parakataha.
“Indiba chinga da•alo namen kusi ong•a, ia ramako Rophul Marak JCB ra•bae tariatengahani gimin chinga Rophul Marak-ko gisik ka•tong gimikchi mittelna sika” ine songni manderang kusi ong•aniko parakataha.