Resubelpara, April 7, 2022 : Rongrong-ni MDC Rinaldo K.Sangma, North Garo Hills a•jao donggipa Dekachang-oni Konchikol-ona aro NH-51 sorok Dingok-oni, Dame Bibra aro Gajing Bibra Dandakkol-ona ta•rake ramarangko taridape on•china, PWD road-ni Chief Engineer-na PWD road-ni Executive Engineer gita Budbar salo lekka sedoataha.
“Anga Resubelpara aro Rongrong jolo songdongenggipa manderangni palo, ia cholko ra•e angni elakkao donggipa ramarang aro bolni dollongrang namsrangjani gimin, u•iataniko on•atna sika. Pilakan Resubelpara-ko North Garo Hills a•jani skotong ba district headquarter ine ma•sitoka, indiba ia NGH-o maming dakeba economic-ni gita tang•dona man•ja. NGH a•ja East aro West Garo Hills-ni bijangchio donggenchimoba rama sorokrang gipin namgipa sorokrangba baksa nangchapa dongja aro dingtang dingtang namroro silroroani project-rang ba kamrangko ning•tugipa songrangona sokata dongja. Chingni jolo ge 11 bolni dollongrang dongkuenga, jean mongsonggipa sorok dilmongona najokena gita song dam 50-ko batsotna nanga. Bang•a hajalni hajal Resu-ni manderang RCC dollongrangko rikna kamko on•aha, indiba da•alona kingkingba darangan kamrangko matchote ka•a dongja. Da•o Resubelpara-ni gimik sorokrangan namjabatsrangahani gimin uarangko taridapchina kamrangko on•aha, indiba ru•uta somoirangoni galchipe donenga” ine Rinaldo Sangma parakataha.
Uni gimin sorokrang aro bolni dollongrangko komibeoba bilsio changgni ba changgittam taridape on•na nanga. Indake ong•engon, bolni dollongrangko RCC rikna on•atgipa fund-rangko gipin kamrangna on•atani a•selsa indakgipa obostarangko chagrongenga. Uni gimin Dekachang-oni Konchikol-ona aro NH-51 Dingok-oni Dame Bibra aro Gajing Bibra, Dandakkol-ona sorokrangko taridapna tangkarangko ta•rake on•atchina Rongrong-ni MDC didiataha.