Rong, Mangsang aro A•dokgre State Highway sorokko ta•rake kam matchotatchina NAS dabia
Williamnagar, May 31, 2022:Sorokrangko tarina sorkarini dongimin somoina batangpiloba Rongjeng, Mangsang aro A•dokgre State Highway sorokko da•onaba matchotkuja ine Niksamso A•chik Society (NAS) Garo Community Organization parakataha.
Iani bidiingo RTI ka•e sandion, Contract man•gipa Company-rang name kam ka•ja ine nikna man•aha. Sorok tarina je billrangko okamanaha, ua sorokko tarigipa contractor sambengni sorok pakmarangko name tarijani a•sel mikka waaenba be•gruangaha ine u•iataha.
Unbaksana dollonrangko ru•uta bilsirangna tarigija donchipe, samba gita rama wate donani gimin NAS suk ong•gijaniko parakataha.
Sorkarini dongimin niam gita sorok tarianiko department name nirokja ine u•ina man•aha. A•songni development-ko kal•ake roaniara, jatko a•songko togia baksana jatko onchepani ong•a ine NAS-ni President Tengrak Marak janapataha.
Rongjeng, Mangsang aro A•dokgre sorokko tarina gong kror 210-ni kamko ta•rake tarichina NAS dabiangaha. Je kamrangko department name nirokja aro matchotgija donchipenga, department-ni office-rangko kam matchotkuja dipetna office picketing ka•e jingjengataniko dakanggen ine NAS mikkrakatangaha.
Uni gimin Rongjeng, Mangsang aro A•dokgre State Highway sorokko ta•rake kam matchotatchina NAS didiataha.