Tura, May 31, 2022: Re•anggipa Sonibar salo A•chik Mahindra Pick-up Union (AMPU)-ni ka•rimska saksa Malseng D Sangma Manggapara Crusher-oniko pick upo rong•te sale re•bapilmitingo Singgimari, Garobadha PWD soroko Chambugong Mahari Association (CMA)-ni gateo gari dongdipate tangka gildrae ra•rikaha ine koborna u•iataha.
PWD soroko gate tarie niam gri gari salgiparangoniko skang tangka gildrae ra•engani gimin Malseng Sangma uamango sing•aha, mai niamo pangchake PWD soroko tangka gilenga, sawa ge•eta, bao order-ara ine sing•ani gimin, uamangni ka•o nange ka•mikkenatako Malseng video ka•e ra•enba Social media-o gipataha.
Indake Malseng Sangma-ni social mediao vedio gipatako niksoe CMA-ni manderang, ka•o nangbate Malseng Sangma-ko dokna ku•chinge dongengmitting somoio Malseng Sangma, May 30 tarik Sombar salo rong•te salna re•angtaiako timsoe, Manggapara songni Belbong Sangma aro gipin ripengrang gariko dongdipate, Malseng D Sangma-ko mikkang aro janggilko doke watataha ine u•iataha.
CMA-ni manderang niam gri tollgate kulie garirangoniko tangka gildrae ra•engako vedio ka•e social mediao gipatani gimin Malseng Sangma-ko CMA-ni manderang dokahachim. Ia ong•a obostako Malseng Sangma, AMPU-na u•iatani bakan Union Tura Pulis Station-o badi ka•aha. Uni ja•mano Tura Main Thana-ni Pulis Officer ia ong•a obostarangko Garobadha Pulis Station-ni Officer in-charge-na u•iatskaaha.
Indake Garobadha Thana-ni pulisrang a•sel ong•ako sandina Ajgar Ali-ni Quarry-ona re•ange dos dakgipa manderangko rim•e Garobadha Thana-ona ra•baaha.
Dos dakgipa manderangko rim•ani ja•mano dolgni CMA aro AMPU-ni membor-rang chanchirimaniko dakahaon, CMA namgrikaniko dakna mol•molahani gimin, AMPU knachake indakgipa obostao pangchake mikkangchi PWD soroko Nokma aro CMA-ni gitaba skatang tollgate-rangko kulie garirangoniko dagrange tangka gildrae ra•na man•jawa, iako namnikjaode uamangni kosako badi ka•giminko chalaianggen ra•galjawa aro compromise-ba ka•jawa ine Union-ni dilgiparang aganaha.
AMPU-ni agana gita CMA tollgate tarie tangka gilaniko da•al dipet dontongatgnok aro mikkangchi Mahindra Pik-up Union-ni driver-rangni kosako maming ong•gija kamrangko ka•taijawaha ine dosi dakgipa Belbong Sangma aro CMA-ni manderang sakkirangni mikkango ku•rachake kema bi•an baksa lekkao see jote on•aha ine AMPU-ni General Secretary Sengrak Momin u•iataha.
Uni gimin mikkangchi Garobadha, Singgimari PWD soroko tollgate kulie tangka gilanirang dongjawaha ine parakataha. Mikkangchi iandake tollgate kulitaie ong•gija tangka giltaianirangko niktaiode, Union-na bakan ia mobile 7005177070-ona call ka•e u•iatna man•gen ine Sengrak Momin u•iataha.