Tura, July 28, 2022: Re•anggipa July 22 tariko Rimpu Bagan-ko pulisrang chadrape sandirikitaniko dakanio bang•a bosturangko ra•seka baksa sak 73 manderangko rim•ani ja•man, July 28 tariko Edenbari-o donggipa Rimpu Baganoniko bang•a silchi darerangko man•taiaha.
Pulisrangni u•iatani gitade, re•anggipa July 22 tarik attamo Rimpu Bagan (RB)-oniko jokatgipa bi•sarangni ba•ra chola aro lekka ki•taprangko ra•na Bristibar salo District Child Protection Unit (DCPU) aro Pulisrang, Rimpu Bagan-ona re•angaha. Indake pulisrang ia biapona sokangon chongipa do•ga ge•sako nike, ia do•gako pe•drake kulion, ia kuturioniko gopretna jakkalgipa bosturangko aro adita silchidarerangko man•aha.
Ua biaponiko pulisrang gelatin stick ge 35, detonator ge 100, chri ge 4 aro bra pong 15 bosturangko man•aha. Ua bosturangko pulisrang bakan kachariona ra•anggen ine pulis official-rang parakataha.
Iani bidingo pulisrang, Bernard N Marak-ni kosako Explosive Substances Act 1908-ni ning•o pangchake mokordoma-ko sedapgen ineba u•iataha.