Tura, July 28, 2022: Monika Momin-ni video ka•e dingtang dingtang kattarangchi Changchang Marak-ni kosako tol•e matnanganiko Changchang Marak raken jegalataha. Changchang Marak-ni parakatani gitade, Monika Momin aro uni dol changni chang Tura bajar whole seller dokkanrangona re•ange, badinggiparangni licence-ko check ka•e, licence gri supply ka•giparangko FIR ka•gen ine ka•mikkenatan baksa bosturangko donram (godown)-rangona naprurue sandianiko dakenba bading chiwalgiparangko kenjagokatani giminsa, Monika Momin-ni kosako badi (FIR) ka•aha. Indiba badi ka•anio Biri Products ba Tobacco-ko janapa dongja, Monika Momin aro uni dol bading chiwalgiparangko neng•nikatengani giminsa Traders & Hawkers Association (THA)-ni gita FIR ka•aha aro FIR-o ma•gipa dolko janapa dongja ine parakataha.
Unbaksana Monika Momin, “Angko aro angni ripeng Parman-ko dagrange phone ka•ataha aro ku•atogija kattarangchi manengataha ine chingko matnanggipa kakket ong•ja, tol•e kratcha•atanisan ong•aia” ine THA-ni President Changchang Marak parakataha.
Gnigipa matnanganiara, Changchang Marak NPP dolni dilgipa ong•e mai miksonganio ma•gipa dolko badi ka•aha ine parakatgipa katta kakket ong•ja. “Anga da•odipet darang political dol baksa bakrima dongja. Uni gimin Monika Momin angko NPP dolni dilgipa ine parakna mai sakki donga aro angko NPP-ni dilgipa ine ma•siode chu•gimik sakkiko on•na man•genma” ineba Changchang Marak sing•doataha. ‘Chinga Traders & Hawkers Association-ni dilgiparang ong•e, bading chiwalgiparangni neng•nikaniko ma•sia uni gimin mikkangchi indakgipa ka•mikkenatanirang ong•taijachinasa FIR ka•aha’ ineba parakataha.
Monika Momin bading chiwalgiparangko ka•mikkenatna mai bil donga? Chamgimin department-sa licence gri badinggiparangko check ka•na man•a, ramram manderang department-ni ge•eta gri maming saloba skatang bading chiwalgiparangko neng•nikatna man•ja aro skatang badinggiparangko ka•mikkenatna man•ja, concern department-sa licence-rangko check ka•na man•a. Ua an•tangni licence check ka•giparangko aro dokkanrangchi naprurue sandiaarangko vedio ka•e viral ka•aha ineba Changchang Marak janapataha.