Resubelpara, April 10, 2022: North Garo Hills a•jani Skotong song Resubelpara-o tom•bimonganiko ong•atenba, Resubelpara Block Trinamool Congress Committee (RBTCC)-ko Sonibar salo songaha ine Rongrong-ni MDC Rinaldo K.Sangma u•iataha.
Resubelpara Block Trinamool Congress-ko songna tom•bimonganiko ong•atangon, a•jani bang•a manderang aro gitcham dilgiparang bakko ra•angtokaha. Ia tom•bimonganio re•baenggipa 2023 eleksino maikai TMC dolko mangrakatna aro cheatna man•gen iani bidingo chanchirimaniko dakangaha.
Ia tom•bimonganio Rongrong elekka-ni MDC Rinaldo K Sangma, Dadenggre elekka-ni Youth Leader Rupa M.Marak-ba bakko ra•angaha.
“An•ching baksa da•o ia tom•anio hajalni hajal manderang gnang. Skango Dr Mukul Sangma-ni Congress Party-o donge kamko ka•engmiting somoio Resubelpara Congress Committee-ni membor-rang aro Office Bearer-rang da•alo an•chingni dilgipa Dr. Mukul Sangma-ko kimkime ja•rikenba ia gital dol TMC-oba bakko ra•pae kamko ka•enga. Resubelpara a•jani ning•o donggipa ge•bri elekkaon chinga Dr. Mukul Sangma-ko cheatna aro TMC dolko bilakatna krenge kamko ka•anggen” ine MDC Rinaldo K. Sangma aganangaha.
Unbaksana Dadenggre elekkani TMC Youth Leader Rupa Marak, “Da•alo a•dokni Skotong Minister Conrad Sangma an•chingni a•dokko namdapatna watatgipa tangka paisarangko jakkalsretan baksa a•dokni sima ari jolo donggipa songrangko ‘Give and Take’ Policy’-o jakkale, Assam a•dokna pakwatatani a•sel da•alo dal•a so•sojengjengko ong•atenga. An•ching a•dokko sildapatna namdapatna, gital dilgiparangko seokani somoi soktaiaha” ine ua aganangskaha.
Ia tom•bimonganio Resubelpara Block Trinamool Congress Committee-ni membor-rangkoba seokangjolaha. Seoka man•gipa membor-rang Pildash Marak President, Sengjrang Sangma Secretary, Bristine Marak Working President aro Kalseng Marak Organizing Secretary-ko jinma kusi ong•e ra•chakenba seokangaha.