Shillong, Jan 24, 2023: TMC-ni candidate-na seokako man•gipa 14-Pynthorumkhrah elakkao-oni susana am•enggipa Samborlang Diengdoh, ‘chonnikgrikgipa’ politics-o bak ra•na sikja ine pa•sikenba TMC-oni ong•katpilaha ine koborna parakataha.
Re•baenggipa February 27 tariko ong•atna sienggipa Meghalaya Assembly election-o susana gita TMC sak 52 candidate-rangko re•anggipa January 6 tariko parakatahachim. Indake TMC-ni candidate-rangko parakanio Diengdoh-ba Pynthorumkhrah elakkani saksa candidate ong•achim.
Samborlang Diengdoh, batanggipa 2018 bilsini Assembly election-o Congress doloni susagipa Banpynshngain Rumnong baksa re•anggipa Sonibar salo, TMC-oni ong•kataha ine u•iataha.
Diengdoh an•tang TMC-oni ong•katako kobor ra•timgiparangna aganengon, ua saksa sakgipinko chonnikgrike aro matnanggrike politics-o dongna sikja, indiba nama kamrangko ka•na sikani giminsa TMC-oni ong•kataha ine aganaha.
Indake ong•genchimoba, ua re•baenggipa election-o Independent candidate ong•e ba jakgittele susaangskagen ine Diengdoh parakataha.