Tura, July 23, 2022:West Garo Hills a•jani SP, VS Rathore-ni parakata gitade, re•anggipa February jani 28 tariko me•chik bi•sa saksa antisa nokoni gimaha ine Pulis Stationo badi ka•eaha. Indake nokni manderang ua me•chik bi•sako nikplani ja•mano, rim•srukanggipa mandeko Tura Women PS-o rimbae on•eaha. Me•chik bi•sako niam gita Hospital rimange porikka ra•e niahaon, uko antisa chipchange changni chang til•edraha ine rim•a man•aha.
Ia obostani bidingo Tura Women PS Case No.24(02)2022 u/s 366A/376 IPC r/w 5/6 POSCO Act-o pangchake badi ka•aha aro sing•sandianiko a•bachengataha.
Til•ekdraako man•gipa me•chik bi•sani Katchario parakani gitade, uko aro uni ripeng saksako, rim•a man•gipa me•asa aro uni ripeng saksa Rimpu Baganona rimange, room ge•sako para ra•e uko changni chang til•ekdraaha ine aganaha.
Uasan ong•aigija Tura songjinmani bang•a manderangni u•iata gitade, Bernard Marak-ni bagan jekon Rimpu Bagan (RB) ine ma•sitokachim, ua bagano niam gri kamrangko ka•enga ine SP u•iataha.
Unbaksana 2000 bilsirangko nipilatgenchimode, uni kosako ge 25 mamlarangko segatgimin gnang. Ua A•chik National Voluntary Council (ANVC-B)-ni dilgipa ong•achim. Indake ANVC-B dolko bon•atgenchimoba, ua da•ona kingkingba niam gri kamrang jekai bajar antio bading chiwalgiparangoniko tangka gildraani, silchi darerang badingsrukani, me•chikrangko pale cha•ani, niamgri chu palani, niamgri lottery ticket-rangko palani, teer counter-rangko chalaiani, gipinni a•arangko ra•sekdraani aro gipin kamrango jak dongengkua ine West Garo Hills a•jani SP, VS Rathore u•iataha.
Indake July 22 pringo Rimpu Baganona re•ange sing•sandianiko dakenba attamni 6 bajioni sandina a•bachengaha aro Sonibar pring 5 bajiosa sing•sandiani skanggipa phase-ko matchotataha. Rimpu Baganona sokangon pulisrang room 30 donggipa buildingko sandina a•bachengaha. Indake ia buildingon me•chik bi•sarangko rimbae til•ekdraenga ine pulisrang potchipe bilakbate sandiaha.
Pulisni u•iatani gitade, Rimpu Bagano me•chik aro me•asarang, room ning•arango, gari ning•arango aro a•palo ring•e rotokenga, mitam manderang ba•ra kancha gri ring•tokenga aro mitamrang be•enni bang•bata bakrangko nikate ringsotokenga. Pulisrang RB-o rosoenggipa sak 68 me•a aro me•chikrangko sing•sandina rim•rikaha. Mitam chadamberang bottle be•arangko gachipchipe kate jokangha. Pulisrang RB-ko nirokenggipa sak 3 staff, caretaker aro manager-koba rim•chapaha. Gimikko rim•anahani ja•mano baganko namedake am•sandianiko dakaha. Pulisrang gari bol-27, bike ba scooty bol-8, autorickshaw bol-1, 650 ml Kingfisher beer te-144, 500 ml Tuborg beer te-16, 650 ml white wine te-25, 650 ml black current wine te-11, 650 ml Red Wine te-12, 650 ml Strawberry wine te-12, 650 ml Banana wine te-7, 650 ml Apple Wine te-9, 180 ml Royal Stag te 24, 180 ml Royal Stag te- 24, 375 ml Royal Stag te-15, 180 ml Signature te-16, 375 ml Signature te-5, 275 ml Blackberry Breezer te-5, 275 ml Jamaican Breezer te-7, Mobile Phone ge 47, cross bow barnet telescope gnangko ge 1, cross bow barnet arrow ge 44, kukuri atte bol 1, Dao ge 1 aro RB-o rona re•bagipa manderangni bimingko segate rakkigipa register, napbaenggipa garirangko segatgipa register, Mikison Sangma-ni Exercise Book, jakkalkugijagipa condom ge 500 aro tangka gong hajar 30-ko man•aha.
Unbaksana pulisrang sak 4 me•a bi•sa aro saksa me•chik bi•sako rongtalgijagipa kuturio tekchange donako nikeaha. Ia bi•sarang kenjagoke mamingkoba agankujaenga. Niamko ja•rike aro bi•sarangni namgnina uamangko District Child Protection Officer (DCPO)-na pakwatataha.
Rimpu Baganoniko ra•sekgipa bosturangko nike, pulisrang ua bagano pale cha•giparang donga ine potchipenga. Ia obostani bidingo, Tura Women PS-o Case No. 105(07)2022 u/s 3/4/5/6/7 of Immoral Trafficking (Prevention) Act, 1957-o pangchake mamlako segataha. Chu•gimik sak 73 manderangko rim•aha aro uamangko court-ona watatengaha ine SP, VS Rathore u•iataha.
Iarangko dakdilenggipa Bernard Marak-ko pulisrang an•tangko Shillong Sadar Pulis Station-o bame on•nechina ge•etataha.