Tura, July 23, 2022: West Garo Hills a•jani Pulisrang Sukrobar attamni 6 bajimango Eden Bario donggipa Rimpu Baganko niam gri chadrape am•sandianiko Bernard N.Marak raken jegalata.
Bernard Marak-ni u•iatani gitade, u•ina man•gijagipa manderang Sukrobar attamo Eden Bari ramao angni bimingko ong•gija kattarangchi lekkarango see pakmarango tape donangaha.
“Ia obostarang angni Shillong-ona BJP Executive Meetingo bakko ra•na aro BJP Candidate President eleksino cheaniko manina re•baani somoio ong•aha. Ian Skotong Minister Conrad Sangma-ni angko galonna sike ge•etgipa kamrang ong•a. Ua GHADC-ni Executive Committee-ko an•tangni namgnina jakkalenga. Ua an•tangni chokkiko BJP dolchi gimaatna kenne, indakgipa kamrangko ka•enga. Skotong Minister-ni angko galonna miksonge indakgipa kamrangko ka•enga, indiba anga maming saloba uni miksonganiko chu•sokatna on•jawa. Ua angna chakenggipa manderangko ma•sretate, an•tangchi salnapna jotton ka•enga. Angni baganona niam gri napdrae sandianiko dakgipa pulisrangni kosako anga badi ka•aha aro Skotong Minister-ni ong•gija kamrangko ma•mong sorkarini BJP dilgiparangna kobor on•ataha” ine Bernard Marak u•iataha.