Shillong, September 13, 2022: Meghalaya a•dokni Skotong Minister Conrad Sangma-ni nama ramako re•dilanichi, bang•a manderang kamko sanditokgija an•tangtangni changa sapani kri dake rike janggi tangani cholko man•aha. Uni didianiko man•ne a•dokni bang•a manderang bading chiwalanio ba an•tangtangna cholko man•anio chu•sokgipa ong•aha.
Manderangni an•tangna janggi tangani cholko bikote ra•anio chu•sokgipa ong•aniko nike Skotong Minister Conrad Sangma, “A•dok sorkari batanggimin bilsirango rakbee kamrangko ka•enba, a•dokni bang•a manderangna an•tangtangni miksongako chu•sokatna re•mikkanganio dakchakaniko on•enga. PRIME Meghalaya, ian ge•sa program ong•a jean manderangna dingtang dingtang cholrangchi dakchakaniko on•a. Je manderangan jaktangchi an•tangtangna kamko ka•engachim, uarangko miksonga gnang kamko ka•gipa manderangna PRIME dakchakaniko on•a. PRIME program-o bakko ra•gipa pilak manderangna gimikni gitan dakchakaniko on•anggen. ASPIRE, iaba ge•sa program ong•a jeon a•dokni chadamberangna poraia skianikosan ong•aigija rokomanti changa sapaniko skie ra•na gita cholko man•gen. Anga a•dokni manderangna PRIME Meghalaya aro ASPIRE program-rango pangchake ka•donganina aro miksongatangko chu•sokatna an•tangtangko on•kangenba bimchipe re•mikkanganiko nike kusi ong•a” ine aganaha.
GreenNE Origin-ko bikotgipa Ayoshee Beriwal, jean Meghalaya a•dokni saksa an•tangni changa sapani gita kamko bikotgipa ba entrepreneur ong•achim, ua bang•a manderangko be•en bimangtangna simsakchina didianiko on•an baksa, mamingba brina ba on•dapa grigipa holdini ginchi ba powder, e•ching powder, bija bitchi, kesunat, dalchini, cha bijak ba uandakgipa bosturangko tarie badingchiwalenba chu•sokgiparangoni saksa ong•a.
Ayoshee an•tangni tarigimin bosturangoni holdini powder-ko noktangni manderangna aro unbaksa kam ka•rimskarangna palchengaha.
“PRIME Meghalaya angni bading chiwalanio angna bang•a dakchakaniko on•aha. Anga Covid-19-ni somoio kamtangko wate jakrara ong•engmitingo, PRIME Meghalaya-ni gimin ma•sie uano bakko ra•aha. Indake anga batanggimin salrangko nipilate anga an•tangni miksongako chu•sokatna kamtangko on•kange re•mikkanganiara maming dakeba gimaani dongjaha” ine Ayoshee an•tangni miksonganiko chu•sokatna man•ne kusi ong•aniko parakataha.
GreenNE Origin, Ayoshee Beriwal-ni kimkim ong•e kamko ka•ani aro PRIME-ni dakchakachi chu•sokgipa ong•aha. Batanggimin 2020 bilsini January jao PRIME-ko Conrad Sangma oprake on•aha.
Ayoshee October jao PRIME-o bakko ra•aha, jean uni bading chiwalanio una bang•a fund-rangko on•aha. Uasan ong•aigija PRIME Meghalaya una bading chiwalani bidingoba bang•a skidapanirangko on•aha.
PRIME Meghalaya baksa kam ka•ani bidingo Ayoshee Beriwal, “Anga PRIME Meghalaya baksa kamko ka•e bang•a dakchakaniko aro skidapanirangko man•aha. Anga PRIME baksa Bangkok a•songona re•ange an•tangni tarie bading chiwalenggipa bosturangko a•gilsakni pilak manderangna mesokna man•ani gimin namen rasong gnangbee aro katchabee nikaha” ine aganaha.
Ayoshee Beriwal Tura songjinmao atchiaha. Ua a•dokni pilak me•chikrangko darangoba ka•dongna nanggija an•tangni changa sapanio ka•donge chadengna sika ineba aganaha.
GreenNE Origin-ni gita ua bang•a ge•e game cha•giparangni janggi tanganiko dingtangatna miksonga. Unbaksana NE a•doko cha•ani rokomrang aro bewalrangko ripingna miksongangjolaha.
PRIME bading chiwalaniko a•bachengna gita tangka gong lak 5-ko on•chengaha, uni ja•mano loan-rangko ra•dapangna nangnikgenchimode, lak 25-ona on•a ine parakataha.
Meghalaya a•dokko skang chengonin Matrilineal Society ba bia ka•ani ja•mano me•asa me•chikni nokchina re•anganina a•gilsak gimikchi mingsing minggama. Indake a•doko me•chikrangna dakchakaniko on•na gita sorkari rakbee kamrangko ka•enga.
Me•chikrangni dakdilenggipa bading chiwalanio tangka gong kror 10-rangni gita gnang. Jeon 20% fund-rangko PRIME Kickstart Grant aro PRIME-na chammaha.
Me•chikrang bading chiwalaniko a•bachengna gita ra•na man•gipa loan-rang, mentor baksa 40 + Start Ups, Register ka•gimin 60+ Start Ups, Prime Kickstart Grant aro Prime Innovation Scale Up loan-na chamgimin 10%, Skill based training aro industry specific incubator-rangko ra•gatanichi bang•a bading chiwalenggipa manderang uamangni badinganio chu•sokgipa ong•aha. Indake a•dokni chadamberang training-ko ra•enba bang•a skidapanirangko man•aha ine mittele aganangaha.