Tura, February 17, 2023: Re•anggipa Butbar walni 8 bajimango NPP dolni manderangko TMC dolni manderang chadrapaha ine Phulbari pulisoniko kobor man•aha.
Pulisni parakatani gitade, 46-Phulbari elakkao TMC-na kam ka•enggipa Bhutto aro uni ripengrang NPP-na kam ka•giparangko TMC candidateni nok sepango chadrapaha ine u•iataha.
“TMC candidate-ni nok sepango, NPP-na kam ka•enggipa manderangko Bhutto aro uni dolrang chadrapaha. A•sel ong•aniko kobor man•soani bakan Dadenggre-ni SDPO aro Phulbari PS-ni OC a•sel ong•gipa biapona taraken re•angaha. Indake a•sel ong•gipa biapona sokeon, pulisrang sak 200 mang TMC candidate-ni nokko dongsoako nikeaha. Saknaako man•gipa Md. Joynal Abedin aro Md. Aynal Haque-ni aganani gitade, Sofiqul Islam jekon Bhutto ba Bhuttu ine mingachim, Abdul Ahmed, Mukul, Shahjahan chadrape dokaha. Bhutto pulisrangni re•baako kobor man•e katsoaha” ine aganaha.
A•sel ong•gipa biapo tom•dake dongsogiparangoni saksa pulisrangko chadrapna jotton ka•dilgipa mandeko pulis rim•aha ine u•iataha.
Indake dos dakgipa aro doka man•gipa manderangko rim•e ra•bamittingo, TMC candidate-ni jikgipa Hasina Zaman aro uni manderang ramao dongsoe pulisna rama watjaha. Indake pulisni rim•e ra•bagipa mandeko rim•drae katangaha. Indiba pulisrang saknaako man•gipa sakgni manderangko Phulbari CHC-ona ra•angaha.
Niam gita mata bua man•gipa manderangko medico-legal examination-ko ra•aha. Uarangoni gipin sak 4 manderang bang•e saknaako man•jaha, indiba me•chik bi•sani ja•a be•sriaha ine porikka ra•na gita watdoataha ineba u•iataha.
Officer in-charge-ni ge•eta gita Phulbari PS, Rajabala PS aro Bhoghularbitha PS-ni pulisrang nangrime a•sel ong•gipa biapona re•ange, obostako tom•tomataha. Ia a•selni bidingo Zonal Magistrate, Flying Squad, State Surveillance aro Assistant Commissioner-ko dakchakchina ge•etataha. Ia obostani bidingo ge•gni case-rang, Phulbari Case No. 05 (2) 2023 u/s 147/ 149/ 186/ 188/ 189/ 224/ 225/ 332/ 353 IPC-o pangchake badi ka•aha, unbaksa Phulbari pulis station-ni Officer In-charge suo-moto case ka•aha. Phulbari PS Case No. 06 (2)2023 u/s 120B, 144/ 307/ 326/ 427/ 448/ 506 IPC-o Joynal Abedin-ni TMC dolna chakgipa sak 32 manderangni kosako badi ka•anio pangchake mamlako segataha aro sing•sandianiko dakaha. Songo noko tom•tomaniko rakkina gita obosta ong•gipa biapo CAPF-ko donataha aro Peace Committee Meeting-ko ong•ate jinma chanchirimaniko dakanggen ineba parakataha.
Sing•sandianiko dakanio ma•siani gitade, chadrapgipa aro doka man•gipa manderang apsan ma•drang mahari ong•a aro TMC candidate-ni nok wilwilao donggiparang ong•achim. NPP-na chakgiparang, TMC-na chakgipa manderangchi doka man•aha. Phulbari elakkao indakgipa obosta ong•ani skanggipa chang ong•jaha. TMC dolna chakgipa manderang candidate-ni noko walni 8 bajimango TMC-ni gitko jangprete watani gimin noksulni bi•sarang porikkana poraianio neng•nikenga ine gitko ka•sinne watchina mol•molahachim, indiba manigija Sofiqul Islam, Abdul Ahmed, Mukul, Shahjahan chadrapaha. Indake a•sel ong•gipa biapona pulisrangni re•baako TMC District WhatsApp Group-ona kobor on•ate jinma manderangko tom•dakatsoaha.
Sofiqul Islam re•anggipa February 7 tariko Charbatapara songo a•sel ong•anioba jak dongachim. Ua obostani bidingo under section
(u/s) 107 CrPC-o pangchake badi ka•anio pulisrang uko rim•aha ineba u•iataha.