Resubelpara, Feb 17, 2023:All India Congress Committee (AICC)-ni Observer aro Star Campaigner ong•e watatako man•gipa Rekkibudin Ahmed, Bristibar salo Bajengdoba elakkani Congress Candidate Bregady N.Marak-ko grongeaha ine koborna u•iataha.
MPYC-ni General Secretary aro Media Coordinator Junebirth C.Marak-ni u•iatani gitade, Rekkibudin Ahmed changittamna Assam Choygaon-ni MLA ong•an baksa saksa Congress-ni Senior dilgipa ong•achim.
Ua North Garo Hills a•jani Bajengdoba elakkaona re•bae Congress candidate Bregady Marak-na campaign ka•angaha aro manderangni bakrimaniko nike namen ong•aniko parakangaha.
Ua saksa Senior Congress dilgipa ong•e jinmana aganangengon, North Garo Hills a•ja gimikon Congress chegen ine ka•donganiko parakangaha.