Tura, Nov 25, 2022:NEHU Tura Campus-o poraienggipa Post Graduate Students’ Union (PGSU)-ni dabianiko chu•sokatjaengani gimin November 25 tarik Sukrobar pring 10:30 bajioni jingjengataniko a•bachengate, NEHU-ni Administrative Block-ko dontongataha ine koborna u•iataha.
Ia jingjengataniko a•bachengatengon, chatro chatrirang maming neng•nikani gri class-rangko pangna ra•ronga gitan ra•angna man•gen ine PGSU-ni President Francist Marak u•iataha.
NEHU Tura Campus-ni namgnina nangchongmotgipa dabianirango sakantian bakrime chakpaaniko on•pachina PGSU mol•molataha.
NEHU Tura Campua-o nangchongmotgipa dabianiranga, skanggipa Pro Vice Chancellor-ko appoint ka•e on•china, gnigipa pangkamgipa Deputy Registar (DR) aro Asaistant Registar (AR)-ko appoint ka•china, gittamgipa Permanent HOD’s-ko on•china aro gipin dabiarang. Ia dabiarangko chu•sokate on•china ru•uta sal somoirangoni dabiengachim, indiba da•alona kingkingba NEHU-ni Vice Chancellor chu•sokate on•kuja ineba parakataha.