Okbima songni manderang re•a doanio rama jal•ang dongjae neng•nikaniko man•enga

Resubelpara, May 8, 2022:North Garo Hills a•jani Mendipathar elakkani ning•o donggipa a•brini song damsa ‘Okbima’ songni manderang re•a doanio namen neng•nikaniko man•enga ine songni manderang u•iataha.
Songni manderangni u•iatani gitade, Okbima songoni Mendipathar bajarona km 9 ba 10 mang chel•achim, ua ramako salanti re•ruraenggipa manderang wachini somoio chi dal•e, Okbima chiringko ga•batna dollong dongjani a•sel namen neng•nikaniko man•enga ine u•iataha.
Ua chiringko batanggimin baditaba bilsina skangan dollong rikna gita on•ahachim, indiba dollong rika matchotgija da•alona kingking galchipe donaha.
Indakgipa obostako chagronge, Okbima songni manderang pilak MLA aro MDC-rangni galchipako man•ne janggi tangna nangenga. Bang•a MLA, MDC chakatgiparang eleksin-ni somoiode songona re•anga, indiba jensalo eleksin cheaha, unode darangba Okbima songko nirokata dongjaha ine songni manderang suk ong•gijaniko parakataha.
Okbima songni manderang chi dal•ani somoio salgimik chi rikamo senge, chi dal•a chepangosa chiko ga•bate Mendipathar bajarona ja•achi re•bae bajar cha•na man•enga. Uni gimin MLA, MDC-rang aro District Administration manderangni neng•nikaniko nirokate Okbima chiringko dollong rike ba kae on•na man•ode, songni manderang neng•nikani komigenchim ine songni manderang janapataha.